Kơmăng hâi lơ 25/12 a Hà Nội po Tơdroăng “Hồ Chí Minh - Tơdroăng pêi pro púi vâ hơnăm 2025” ƀă pơxá “ Việt Nam hơniâp ro kro mơdrŏng”,  pơ eăng  mau khu pú hên, mâu ngế kơhnâ rơkê tung lâp tơnêi têa tung tơdroăng hriâm ƀă pêi pro tiô tuăn mơno, ki lĕm, túa pêi cheăng Hồ Chí Minh.

Tung 90 phut, tơdroăng mê pêi pro mơhno ki lĕm mâu tơdroăng hơ’muăn ‘na pleăng hnoăng cheăng pêi, hriăn pêi ki nếo xua kuăn pơlê, ing mê tơbleăng troh lâp lu ki kơnía lĕm tro, pro xiâm rơdêi ăm tơdroăng mơhnhôk tơ’noăng pâ nhoăm tơnêi têa.

Troh veăng leh ƀă tơbleăng, pôa Tô Lâm, Kăn xiâm pơkuâ hnê ngăn Đảng tối nhên, ing hnoăng pơkuâ hnê dêi Đảng, tơdroăng hơ’lêh nếo ‘na xing xoăng pro rế lĕm khu tơrŭm cheăng mâu kăn tung khu cheăng kal kí tiô troăng rah xo iâ mơngế pêi cheăng xêt, tơbrê pơtối mơdêk rơdêi, vâ pêi tiô pơkâ mơjiâng mâu kăn ki achê kuăn pơlê, xua kuăn pơlê; pêi pro tơbrê mâu luât pơkâ mơnhông cheăng kâ - pơlê pơla, tơmâng khât, tơdroăng rêh ối dêi kuăn pơlê. Pôa Tô Lâm  Kăn xiâm pơkuâ hnê ngăn Đảng pơkâ thế tâi tâng Đảng, tâi tâng khu cheăng kal kí pơtối  mơ-eăm ‘’Ôh tá lôi ngế ki lâi ‘na rŏng”, po rơdâ tơdroăng cheăng mơnhông tơnêi têa.