Ƀă tơdroăng ki vâ pơtroh “Tơdjêp kơto mơheăm Việt”, hơnăm kố, tơdroăng pleăng mơheăm khêi châ tơkŭm po tung pơla 2 khế a 48 to kong pơlê, pơlê kong kân tung lâp tơnêi têa. A Dak Lak, kố cho hơnăm ki má 10 po tơdroăng kố ƀă ki xiâm cho tơdah xo mơheăm iâ hlái châ 500 tơdrong, tơdrêng amê hlối hnê tối ăm mâu rơxông hơnăm ối nếo ‘na túa pơreăng mơheăm tơprâ sap ing tơxĭn xuân môi tiah túa ki hvái ngăn ƀă hbrâ mơdât pơreăng kố.

Tơdroăng ki tơkŭm po a Dak Lak châ xo tơdroăng ki môi tuăn pêi pro, veăng dêi hên hĭn kuăn pơlê ôh ti xê to a mâu kơpong tíu xiâm mê ối tá a kơpong hngế hngo. Ing mê pêi pro plah tơdroăng ki tŏng kum mơheăm teăm tơdrêng ăm tơdroăng ki pơlât, tŏng kum mâu tơdroăng ki kal vâ mơheăm tung mâu rôh pơtê hriâm ƀă mâu hâi têt.

Ing tơdroăng ki pêi cheăng kố cho va hnê tối ăm kuăn pơlê hlê tro ‘na tơdroăng pleăng mơheăm ƀă veăng pleăng mơheăm. Ing mê, bro ivá ai khu ki veăng pleăng, mơhnhôk kuăn pơlê pleăng mơheăm pơlât mơngế.