Mơgêi roh pêi cheăng, pôa Hồ Đức Phớc, Phŏ Ngế pro xiâm hnê ngăn tơnêi têa tối nhên: Hngêi arak liăn kum rêh ối pơlê pơla cho môi tung mâu ‘’tíu ki kum’’ tung tơdroăng pêi pro mâu troăng hơlâ kơdroh kơtiê, tơniăn rêh ối pơlê pơla a Việt Nam, kum mơngế kơtiê ƀă mâu ngế ki ai troăng hơlâ tơnêi têa tŏng gum ki ê, ôh tá lôi kơbố parŏng. Ƀă troăng pêi rơkê kố, khu khu cheăng tơnêi têa rế thế kêi đeăng, rơkê, kum châ tơƀrê khu ngế ki ai troăng hơlâ tŏng gum cho mơngế kơtiê ƀă mâu ngế ai troăng hơlâ tŏng gum ki ê.

Phŏ Ngế pro xiâm hnê ngăn tơnêi têa xuân tơpui tối ƀă pâ thế i nhên dêi Hngêi arak liăn kum rêh ối pơlê pơla, pơcháu Khu xiâm tơleăng ƀă tơbleăng pêi pro tiô hnoăng. Phŏ Ngế pro xiâm hnê ngăn tơnêi têa pói vâ ƀă loi tơngah tung la ngiâ, Hngêi arak liăn kum rêh ối pơlê pơla kô pơtối mơnhông ó rơdêi, tơxâng tơdroăng pơkâ mơnhông dêi pơlê pơla.