Kơxê lơ 12/1, Khu râ kăn pêi cheăng dêi Chin phuh xua pôa Hồ Quốc Dũng, Phŏ Ngế pro xiâm hnê ngăn tơnêi têa pơkuâ djâ hiăng troh lăm pôu kuăn pơlê kơpong têa kân lân lu a cheăm Hòa Thịnh ƀă pêi cheăng ƀă Vi ƀan kong pơlê Dak Lak vâ mơnhên, mơhnhôk pêi pro “Cheăng pêi thâ Quang Trung’’ mơjiâng, rơnêu hngêi ối ăm mâu rơpŏng kuăn pơlê ki tro tơ’nhê klêi kơ’nâi kong mêi têa kân lân lu.

Phŏ Ngế pro xiâm hnê ngăn tơnêi têa troh lăm kơ-êng, mơhnhôk mâu rơpŏng ki tro tơdjâk ó tung roh têa lân lu mơ’nui hơnăm 2025 pơla kố nah, rơkâu kuăn pơlê hiăng ai hngêi nếo chiâng vâ rêh ối, rĕng tơniăn tơdroăng rêh ối. Tiô tơbleăng, troh hâi lơ 12/1, Dak Lak hiăng rơnêu klêi 892 toăng hngêi tro tơ’nhê; tung 606 toăng hngêi thế mơjiâng nếo, hiăng pêi kêi 529 toăng hngêi, châ lối 87%, kơxô̆ ki ê dế châ pêi pro rĕng.

Pôa Hồ Quốc Dũng, Phŏ Ngế pro xiâm hnê ngăn tơnêi têa pơkâ kong pơlê Dak Lak tơkŭm tâi tâng mơngế pêi cheăng, kêi đeăng 77 toăng hngêi ki u ối tro tiô tơdroăng pơkâ pro, tơdrêng amê mơdêk rĕng rơnêu hngêi trăng, troăng klông, pêt mơjiâng tơmeăm, tơniăn rêh ối ăm kuăn pơlê kơpong têa lân lu.