Tơpui a rôh leh, pôa Hồ Quốc Dũng, Phŏ Ngế pro xiâm hnê ngăn tơnêi têa pơkâ thế mơjiâng Viê̆n On tơhrik kơtâu ƀă trếo tik nik Việt Nam chiâng khu tơrŭm cheăng xiâm tung hriăn ngăn khoa hok, mơjiâng pro kong ngê̆, tŏng gum ‘na kih thuât ƀă hnê ‘na on tơhrik kơtâu ƀă trếo tik nik.

Phŏ Ngế pro xiâm hnê ngăn tơnêi têa tối nhên Đảng, Tơnêi têa mơnhên on tơhrik kơtâu ƀă trếo tik nik ai hnoăng cheăng kal khât tung rak vế tơniăn tŭm on tơhrik ƀă pêi pro pơkâ pêi mơ’no trếo ‘mêi vêh 0 a hơnăm 2050. Chin phuh dế rĕng hbrâ rơnáu mơjiâng pro tơdroăng tơkêa bro Hngêi kơmăi on tơhrik kơtâu ƀă trếo tik nik Ninh Thuận 1 ƀă tơdroăng tơkêa hriăn ngăn khoa hok, kong ngê̆ trếo tik nik a Đồng Nai.

Kố cho mâu tơdroăng tơkêa bro ki kal dêi tơnêi têa, pâ thế mâu kơ koan ki ai tơdjâk troh, tung mê ai Viê̆n On tơhrik kơtâu ƀă trếo tik nik Việt Nam, athế tơkŭm hên liăn ngân vâ tơbleăng pêi pro.