Ngế pro xiâm hnê ngăn Chin phuh ăm ‘nâi, vâ rah pro rế lĕm mâu kăn ƀă môi tuăn ing tíu xiâm rak ngăn, Chin phuh hiăng tơkŭm po nếo Khu hnê mơhno, tơrŭm môi chiâng môi khu hnê mơhno tơdjuôm tơrŭm pêi 4 tơdroăng pơkâ tơnêi têa (mê cho: Mơjiâng thôn pơlê nếo; Mơnhông cheăng kâ - pơlê pơla kơpong kuăn ngo ƀă kong ngo; Mơnhông túa lĕm tro; Rak ngăn ivá, pơ’leăng mâ kuăn pơlê ƀă mơnhông cheăng tiô túa lĕm nếo, mơdêk tơbrê hnê hriâm ƀă hnê mơjiâng tuăn ngôa rơkê).  

Krê Tơdroăng pơkâ dêi tơnêi têa ‘na hbrâ, mơdât ma tŭi xua Khu xiâm kong an hnê mơhno. Ngế pro xiâm hnê ngăn tơnêi têa pơkâ troăng hơlâ ‘mâi mơnhông tơdroăng xo liăn ngân, malối liăn ‘no pêi cheăng hơnăm 2026 ƀă liăn pêi cheăng pơla hơnăm 2021–2025 châ rak pêi troh hơnăm 2026. Pakĭng mê, mâu kơ koan xing xoăng ăm Khu xiâm ngăn chiâk deăng ƀă Hyôh kong prâi, Khu xiâm ngăn Kuăn ngo ƀă Loi tĭng tiô khôp kal tơrŭm krá ƀă Khu xiâm ngăn hnê hriâm ƀă hnê mơjiâng tuăn ngôa rơkê, Khu xiâm ngăn túa lĕm tro, tơ’noăng ivá ƀă Ôm hyô vâ tơbleăng pêi tơdâng mâu tơdroăng, tơniăn pê klêi mâu tơdroăng pơkâ.