Tối tơbleăng ăm hlo, 6 khế hdrối, mâu khu xiâm, kơvâ cheăng, kong pơlê hiăng tơbleăng hên tơdroăng tơ’noăng pâ nhuô̆m tơnêi têa tro ƀă hnoăng cheăng mơnhông cheăng kâ rêh ối pơlê pơla. Ki rơhêng vâ tối, hâi lơ 13/6, Ngế pro xiâm hnê ngăn tơnêi têa tơbleăng tơdroăng tơ’noăng pêi pro pơkâ pêi tâk mơnhông krá tơniăn péa kơxô̆ pơla hơnăm 2026 - 2030.

Tơpui a rôh hôp, Ngế pro xiâm hnê ngăn tơnêi têa tối nhên tơ’noăng athế tơmiât troh ki tơƀrê ai pơxúa, xo tơdroăng ki tơƀrê pơxúa mê veăng gum ăm mơnhông tơnêi têa, rak vế tơniăn gâk kring pơlê pơla cheăm bêng ƀă mơdêk tơdroăng rêh ối kuăn pơlê pro loăng rêk vế ngăn, khŏm mơ-eăm ‘mâi rơnêu mâu tơdroăng ki pêi pro ki mơhno a ngâ, tơdroăng pêi tơƀrê.

Ngế pro xiâm hnê ngăn tơnêi têa mơhno nhên, ki khât gá tung pơla hdrối nah hiăng ai hên túa pơkâ pêi nếo, túa pêi ki tro ‘ló pro tơdjâk ki lĕm tro. Mê cho rôh pơhlêh kân pro lế lĕm kơ koan pêi cheăng, pro tơ’lêi hlâu mâu tíu kreăng ăm mâu tơdroăng tơkêa bro ki kal dêi tơnêi têa, mâu tơdroăng ki tơdjâk troh hiâm mơno kuăn mơngế sap ing tơdroăng pêi cheăng thâ 500 hâi măng tí tăng rôu, tơkŭm kơxêng kiâ mố đô̆i ƀă mơnhên inâi mâu kơxêng kiâ mố đô̆i.