Kơxê lơ 25/12, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa veăng Hneăng hôp lâp tơnêi têa mơgêi 20 hơnăm pêi pro Tơdroăng pơkâ 36 dêi Khu xiâm kal kí ƀă mâu hlá mơ-éa hnê mơhno tơdjâk troh tơdroăng mơngế Việt Nam a kong têa ê. Hneăng hôp mơnhên pơlê pơla Việt Nam a kong têa ê cho khu ki ôh tá păng lôi dêi hdroâng mơngế, cho mơngế pêi cheăng ki kal veăng gum ăm tơdroăng mơnhông dêi tơnêi têa.

Klêi kơ’nâi 20 hơnăm pêi pro Tơdroăng pơkâ, pơlê pơla hiăng mơnhông ó rơdêi tá ‘na kơxô̆ ƀă ki dâi lĕm, ing dâng 2,7 rơtuh ngế hơnăm 2004 tâk vâ chê 6,5 rơtuh ngế a lối 130 kong têa ƀă kơpong tơnêi tơníu, tung mê, dâng 80% rêh ối a mâu kong têa mơnhông mơdêk, ai tíu pêi cheăng rế hía rế châ mơnhên.

Xông tơpui a hnê mơhno hneăng hôp, pôa Phạm Minh Chính, Ngế pro xiâm hnê ngăn tơnêi têa pơtối pêi kêi đeăng troăng hơlâ, pro tơ’lêi hlâu ăm kuăn pơlê veăng trâu hơngế tung tơdroăng rêh ối cheăng kâ – pơlê pơla, mơnhông tuăn ngôa rơkê, thăm tơdjêp ƀă mơjiâng tíu pêi cheăng ‘na pơlê pơla mơngế Việt Nam a kong têa ê.