Kơxê hâi lơ 18/7, pôa Phạm Minh Chính, Ngế pro xiâm hnê ngăn tơnêi têa hiăng lăm séa ngăn Kơno ki pơto chơ kế tơmeăm ngi kong têa ê Cần Giờ ƀă tơdroăng tơkêa Kơpong kơphô̆ ki hdi têa kơxĭ Cần Giờ, Pơlê kong kân Hồ Chí Minh. Kơno ki pơto chơ kế tơmeăm ngi kong têa ê Cần Giờ, tiô tối hdrối kô bro a Cù Lao Phú Lợi a bo têa kroăng Cái Mép – Thị Vải, tơring Cần Giờ, tâi tâng ƀăng tơnêi kơno dâng 571 ha ƀă ƀăng tơnêi a mâ têa dâng 477 ha; Tâi tâng kơlo liăn ‘no bro ăm tơdroăng kố cho lối 5 rơtal dollars.

Kơpong kơphô̆ ôm hyô hdi xo têa kơxĭ Cần Giờ ai tâi tâng ƀăng tơnêi cho 2.870 ha, tâi tâng kơlo liăn ‘no lối 217.000 rơtal liăn. Klêi kơ’nâi séa ngăn, pôa Phạm Minh Chính, Ngế pro xiâm hnê ngăn Chin phuh ai rôh pêi cheăng ƀă kăn pơkuâ Khu xiâm, kơvâ cheăng Tơnêi têa ƀă Pơlê kong kân Hồ Chí Minh vâ pơkâ troăng bro kơpong Cần Giờ ƀă krá ton. Ngế pro xiâm hnê ngăn Chin phuh cho pôa Phạm Minh Chính pơkâ thế Pơlê kong kân Hồ Chí Minh rĕng bro túa pơkâ mơnhông Pơlê kong kân; ‘mot tơ’nôm, pêi klêi túa pơkâ mơnhông tơring Cần Giờ, pơkâ tung tâi tâng túa pơkâ Pơlê kong kân.

Tung mê, ai kơphô̆ ki hdi têa kơxĭ Cần Giờ ƀă mâu tơdroăng tơkêa bro ki ê. Ngế pro xiâm hnê ngăn tơnêi têa pơkâ thế túa pơkâ mơnhông tơring Cần Giờ tối tơdjuôm ƀă Kơpong kơphô̆ ki hdi têa kơxĭ Cần Giờ tối krê athế ‘nhiê tah lôi tâi mâu kế tơmeăm ki châ bro akố, vâ rơnêu ƀă kum, bro kơdroh tơdroăng ki pá hâ ho a troăng prôk, tơnêi tơníu rêh ối ƀă hngêi ối ăm kuăn pơlê a kơpong tíu xiâm Pơlê kong kân Hồ Chí Minh.