Kơxê lơ 20/7, pôa Phạm Minh Chính, Ngế pro xiâm hnê ngăn tơnêi têa hiăng tơdah jâ Janet Yellen, Ngế xiâm râng liăn ngân kong têa Mih. Ngế pro xiâm hnê ngăn tơnêi têa phiu ro mâu tơdroăng tơrŭm cheăng, mâu tơdroăng mơnhên ki ôh tá tơdjâk pa kong ƀă tơtro dêi Khu xiâm pơkuâ liăn ngân kong têa Mih ‘na pơkuâ troăng hơlâ liăn ngân, yă liăn dêi Việt Nam.

Tiô hiâm mơno tá hiâm mơno, tơdroăng ki loi tơngah, phuâng tơ’lêi, Ngế pro xiâm hnê ngăn tơnêi têa pơkâ thế péa pâ pơtối tơpui tơno khu râ kăn xiâm ƀă mâu râ, thăm tơdjêp péa tơdroăng cheăng kâ, thăm pêi pro rơdêi cheăng kâ, tê mơdró, mơ’no liăn cheăng, tung mê ai tơtêk châ tơƀrê hên, hơ’lêh nếo troăng tơmiât pêi, kŏng ngê̆ tiô rơxông nếo, tơdroăng tê tơmeăm...

Tơdrêng amê, thăm pêi pro rơdêi tơrŭm cheăng hbrâ ví kong prâi hơ’lêh, pêi pro tơbleăng Khu tơrŭm cheăng tơdâng, tŏng kum Việt Nam mơnhông mơdêk kơvâ kơmăi kmok ki vêh pro. Ngế xiâm pơkuâ liăn ngân kong têa Mih mơnhên Việt Nam cho khu tơrŭm cheăng rế hía rế kal khât ƀă kong têa Mih ƀă ai hnoăng xiâm tung troăng pêi cheăng ton xŏn Ấn Độ Dương – Thái Bình Dương  dêi kong têa kố.

Mih pói vâ thăm pêi pro rơdêi tơrŭm cheăng kâ, tê mơdró ă Việt Nam; ai pơkâ thăm tơrŭm cheăng ƀă Việt Nam ‘na tơdroăng mơdró tơmeăm tiô troăng khu tơrŭm tâi tâng, loi tơngah; tŏng kum Việt Nam mơdêk ivá mơjiâng pro chip hrik ‘no hyôh ƀă on tơhrik ki vêh pro.