Kơxo lơ 16/7, pôa Phạm Minh Chính, Ngế pro xiâm hnê ngăn tơnêi têa pêi cheăng ƀă Khu pơkuâ cheăng Đảng kong pơlê Bắc Kạn. Mơgêi roh pêi cheăng, pôa Phạm Minh Chính kheăn kơdeăn mâu tơdroăng mơ-eăm ƀă tơdroăng châ tơƀrê hiăng châ Đảng ƀô̆, khu râ kăn pơkuâ, khu lêng ƀă kuăn pơlê kong pơlê Bắc Kạn, kum kal khât tung mâu tơdroăng châ tơƀrê tơdjuôm dêi lâp tơnêi têa.

Tung la ngiâ, Ngế pro xiâm hnê ngăn tơnêi têa pơkâ, kong pơlâ Bắc Kạn pêi pro kơtăng, châ tơƀrê Pơkâ Hneăng hôp má XIII dêi Đảng, Pơkâ Hneăng hôp Đảng ƀô̆ kong pơlê; Pêi tiô tơdroăng nôkố, thế ai tơdroăng mơ-eăm hên, pêi tiô kơtăng, châ tơƀrê. Cho kong pơlê ai kơdrâm kuăn pơlê hdroâng kuăn ngo rêh ối, mơ’no ăm mơjiâng hngêi trăng, troăng klông, mơdró ôm hyô ƀă hlối tơniăn gâk kring, tơniăn lâp pơlê pơla ƀă đi đo hơ’lêh tơdroăng rêh ối dêi kuăn pơlê.

Mơnhông mơdêk thế pêi pro tơdâng tơ’mô ƀă rơkê pơlê pơla. Ngế pro xiâm hnê ngăn tơnêi têa tối nhên, kong pơlê thế pêi lĕm tro tơdroăng pơkâ pêi ƀă mơdêk hngêi trăng, troăng klông, ngăn kố cho hnoăng cheăng kal kí ki xiâm ƀă kơjo dêi kong pơlê. Thâ pêi kêi đeăng ƀă kĭ pơkâ pêi hneăng hơnăm 2021 – 2030, tơmiât pêi troh hơnăm 2050.