Kơxo hâi lơ 19/7, pôa Phạm Minh Chính, Ngế pro xiâm hnê ngăn tơnêi têa pơkuâ hneăng hôp Khu hnê mơhno cheăng ‘mâi hơ’lêh tơdroăng cheăng dêi Chin phuh. Tiô tơbleăng, tung 6 khế apoăng hơnăm, tơdroăng ‘mâi hơ’lêh cheăng pơtối ai mâu tơdroăng pơ’lêh nếo. Tung tơkŭm tơleăng mơnhên mâu tơdroăng xơpá, tơvâ tơvân ki tơdjâk troh ‘mâi hơ’lêh tơdroăng cheăng, malối tơdroăng mâu hlá mơ-éa.

Mâu khu xiâm, kơvâ cheăng, kong pơlê xuân hiăng mơ-eăm pêi tơdroăng châ pơcháu. Tiô tơdroăng ki riân , po ngăn, pơkâ ‘mâi hơ’lêh tơdroăng pro hlá mơ-éa dêi mâu khu xiâm, kơvâ cheăng tơdâng khu xiâm tơbleăng 845 tơdroăng cheăng, Vi ƀan mâu kong pơlê, pơlê kong kân hiăng tơbleăng pơkâ 3003 tơdroăng cheăng.

Mâu khu xiâm, kơvâ cheăng xiâm hiăng pê klêi 295 tơdroăng cheăng; Vi ƀan mâu kong pơlê, pơlê kong kân hiăng pê klêi 1384 tơdroăng cheăng. Ngế pro xiâm hnê ngăn tơnêi têa pơkâ thế, mâu ngế tung khu kăn tơkŭm tối, mơnhên mâu tơdroăng hiăng châ pêi pro, mâu tơdroăng ki lâi hâi pêi pro, tơdroăng ki lâi ối tơvâ tơvân tung pro hlá mơ-éa tối tơdjuôm, tung mê, tơkŭm mơnhên ƀă tơbleăng troăng rơhlâ, ‘mâi pro mâu tíu ki u ối tung tơvâ tơvân tung tơbleăng pêi pro mâu tơdroăng.