Kố cho rôh lăm pôu păng ‘nâng apoăng dêi ngế ối a ko Đảng, Tơnêi têa Việt Nam troh a Siam klêi kơ’nâi hneăng hôp XIV dêi Đảng ƀă klêi kơ’nâi kơ koan cheăng tơnêi têa pơkuâ nếo dêi Việt Nam châ tơkŭm tâi tâng. Ki rơhêng vâ tối, Siam cho kong têa ối tung ASEAN apoăng châ Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa rah xo pôu păng ‘nâng tung tơdroăng cheăng tơpui kâ râ kăn xiâm a kơpong.

Rôh pôu kố cho tung hơnăm péa tơnêi tơbâ 50 hơnăm mơjiâng tơrŭm cheăng tơpui kâ ƀă klêi kơ’nâi Việt Nam - Siam mơdêk tơrŭm cheăng kong têa tơrŭm tung la ngiâ tŭm têk a khế 5/2025. Rôh lăm pôu kố châ tơngah kô cho ivá mơdêk nếo tơrŭm cheăng pơla péa pâ rế hía rế ai pơxúa, trâu rơdâ, veăng gum ăm tơniăn lĕm ƀă mơnhông dêi kơpong ASEAN.