Pêi pro hnoăng trâm mâ kuăn pơlê klêi kơ’nâi hneăng hôp má môi, Kuô̆k hô̆i hneăng XVI, kơxo lơ 4/5, pôa Tô Lâm, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa rơtế ƀă mâu Kăn Kuô̆k hô̆i tíu pêi cheăng tâ phĭu kơxô̆ 1 Pơlê kong kân Hà Nội ai rôh trâm mâ kuăn pơlê a 10 to bêng Ba Đình, Ngọc Hà, Giảng Võ, Đống Đa, Kim Liên, Văn Miếu - Quốc Tử Giám, Láng, Ô Chợ Dừa, Hoàn Kiếm ƀă Cửa Nam vâ tơbleăng klêi kơ’nâi hneăng hôp ƀă tiâ mơnhên tơdrêng mâu rơkong tơpui tối, pâ thế dêi kuăn pơlê.

A rôh trâm mâ, tiâ rơkong pâ thế dêi kuăn pơlê ai tơdjâk troh ki tơƀrê dêi túa pêi cheăng kăn pơkuâ 2 râ, pôa Tô Lâm, Kăn xiâm pơkuâ hnê ngăn cheăng Đảng, kăn xiâm hnê ngăn tơnêi têa tối rơdêi kuăn pơlê tơmâng xo kơ koan cheăng apoăng ki iâ, ‘nâng ‘nâi tâ, râ kong pơlê hbrâ rơnáu tâ, hlá mơ-éa chêh pro xuân tơ’lêi hlâu tâ. Laga, tơdroăng ki kuăn pơlê kal rơhêng vâ cho túa pêi cheăng nếo athế pro chiâng pơhlêh ki rơkê tung tơdroăng ki gum kuăn pơlê ƀă khu mơdró kâ; râ kong pơlê athế pêi pro achê kuăn pơlê, ‘nâi nhên tơdroăng kuăn pơlê rơhêng vâ cheăng pêi, tung tơdroăng hnê mê tro ƀă pêi cheăng rêm hâi dêi kuăn pơlê.

Pôa Tô Lâm, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa tối nhên mâu tơdroăng pơkâ tơmiât pêi ki kân vâ Pơlê kong kân Hà Nội tơkŭm hnê mơhno ƀă tơkŭm pêi pro tung la ngiâ, tung mê Hà Nội athế pơkâ Luât Pơlê kong xiâm ƀă túa pơkâ Pơlê kong xiâm tung rơnêu tâi tâng vâ khoh môi tuăn vâ tơkŭm pêi pro.