A Hngêi krê Đăi tươ̆ng Võ Nguyên Giáp a 30 Hoàng Diệu, Hà Nội, pôa Tô Lâm, Kăn xiâm pơkuâ hnê ngăn cheăng Đảng hiăng chôu nhâng, pleăng reăng, mơjo pâ mơhno hiâm mơnê kân kơ Đăi tươ̆ng Võ Nguyên Giáp, Kăn xiâm pơkuâ ngăn Khu lêng kuăn pơlê Việt Nam.

Lối 30 hơnăm pro kăn xiâm pơkuâ ngăn lêng, kăn pơkuâ ngăn Đảng lêng Tơnêi têa, inâi Đăi tươ̆ng Võ Nguyên Giáp hiăng krêa ƀă tơdroăng ki ƀlêi trâng kân dêi péa rôh tơplâ xâ Pơhlăng ƀă xâ Mih, ƀă tơdroăng cheăng mơjiâng ƀă rak vế Tơnêi têa. Đảng, Tơnêi têa ƀă kuăn pơlê pin mơnhên tối khât hnoăng cheăng kân dêi Đăi tươ̆ng cho Ngoh Rơmúa dêi Khu lêng kuăn pơlê Việt Nam.

A hngêi tơbâ Đăi tươ̆ng Văn Tiến Dũng, pôa Tô Lâm, Kăn xiâm pơkuâ hnê ngăn cheăng Đảng hiăng têk on trĭng ki xú hŏm, mơhno tối hiâm mơno ‘nâ pâ mơnê kơ Đăi tươ̆ng Văn Tiến Dũng, kăn xiâm pơkuâ ngăn lêng hneăng apoăng, ngế ki hiăng ai hên ivá veăng gum kal khât tung tơdroăng tơplâ tơleăng lĕm hdroâng mơngế, mơjiâng ƀă rak vế Tơnêi têa Việt Nam xah hô̆i chuh nghia.