Hôp tơno tơdroăng kal tơdjêp ƀă vâ chê 35.000 tíu hrik mơ’no hyôh măng tung lâp tơnêi têa. Veăng ƀă xông tơpui hnê mơhno a hôp tơno tơdroăng kal, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, Tơdroăng pơkâ kơxô̆ 10 mơhno tơdroăng ki pơhlêh tung troăng tơmiât mơnhông mơdêk, ôh tá tiah ton nah xếo lôu péa tơdah kơxô̆ liăn ki hiăng hbrâ rah ƀă xúa kơxô̆ liăn lâp plâi tơnêi vâ mơjiâng ivá tơbriêt cheăng tơnêi têa.

Klêi kơ’nâi mơhno inhên mâu tơdroăng tá hâi tơtro tung mơhnhôk FDI tung pơla kố nah, pôa Tô Lâm mơnhên, Tơdroăng xiâm tơbleăng 10 ai mơ’no mâu tơdroăng pơkâ pêi troh ƀă pơkâ hên tâ: mơnhông mơdêk cheăng kâ ai kơxô̆ liăn mơ’no a kong têa ê thế mơdêk ivá ki pơkuâ xêh troăng pêi cheăng ton xŏn, ivá mơjiâng pro, kơmăi kơmok ƀă ivá tơbriêt cheăng dêi tơdroăng cheăng kâ; mơ-eăm troh hơnăm 2030 Việt Nam ối tung khu ki ối má môi ASEAN ‘na tíu mơ’no liăn cheăng tê mơdró, ivá tơbriât cheăng, pơhlêh nếo tơmiât pêi rơkê, ki dâi lĕm pro mơ-éa rêh ối cheăng kâ ƀă tơnêi têa ƀă ivá tơdah mâu tơdroăng tơkêa bro mơ’no liăn cheăng kong têa ê dâi lĕm.

Pôa Tô Lâm tối rơdêi, khŏm tơpui ƀă pêi pro tơdroăng ki djâ dêi pó, mơ-éa hên hĭn. Ôh tá lôi khu mơ’no liăn cheăng thế prôk hluâ hên tíu, mơdoh hên chôu ƀă kơxô̆ liăn vâ pêi pro môi tơdroăng tơkêa bro tro luât. Tơdroăng xiâm tơbleăng 10 hiăng mơnhên 6 tơdroăng hnê mơhno, 6 pơhlêh kân ‘na troăng tơmiât mơnhông ƀă châ pơkâ troh hơnăm 2030 mơhnhôk 200 – 300 rơtal dollars kơxô̆ liăn mơ’no tơdrêng kong têa ê.

Tơmiât troh hơnăm 2045, Việt Nam chiâng tíu xiâm mơjiâng tơmeăm, tê mơdró, pơhlêh nếo tơmiât pêi rơkê ƀă pơkuâ kơpong dêi hên grup pơkuâ hên kong têa.