Hà Nội pêi châ hên tơdroăng ai pơ xúa GRDP tâk 8,22% , xo liăn ngân  lối 404 rơpâu rơtal liăn, xo liăn ngân ‘no pro tơmeăm khoăng tơnêi têa lối 63 rơpâu rơtal liăn. Khê̆n kơdeăn mâu tơdroăng mơ-eăm dêi pơlê kong kân tung pê klêi luât pơkâ, mơnhông pro tơmeăm khoăng, ‘mâi hơ’lêh luât ƀă tơkŭm mơnhông tơ brê.

Kăn xiâm pơkuâ hnê ngăn Đảng kăn xiâm hnê ngăn tơnêi têa  pơkâ  thế Hà Nội  tơmâng pêi 8 tơdroăng cheăng ki kal 6 khế mơ’nui hơnăm, ngăn ki tâk péa kơxô̆ cho hnoăng cheăng kal kí. Mê cho Hà Nội thế pro tơbrê ‘na khoa hok, kong ngê̆, hơ’lêh nếo, hriĕn plĕng ki nếo, pơ’lêh kơxô̆ ƀă xiâm mơngế pêi cheăng rơkê. Hà Nội thế djâ troăng a hdrối tung mơjiâng cheăng kâ ngăn a tuăn ngôa rơkê, tơdroăng chêh ‘măn tung kơmăi ƀă hriĕn plĕng, mơdêk pêi tro, tơdjêp ƀă tăng tơdroăng cheh ‘măn xúa tơdjuôm pơtối pơkuâ, tối hdrối ki tâk, séa ngăn ‘no liăn pro tơmeăm khoăng tơnêi têa, rak ngăn tơnêi, tơleăng mơnhên pro hlá mơ-éa ƀă hlối tơniăn pơlê pơla.