Mơgêi rôh pêi cheăng, pôa Tô Lâm, Kăn xiâm hnê ngăn Đảng, Kăn xiâm hnê ngăn tơnêi têa mơnhên, tung la ngiâ kal thế mơnhên ki dâi lĕm mơngế pêi cheăng, thế pơhlêh ing nhuô̆m kơxô̆ troh nhuô̆m ‘na ki dâi lĕm, châ tơƀrê xúa ƀă tơdroăng ki veăng gum hên ƀă pêi lo châ hên tơmeăm tung pêi cheăng.

Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tơtrŏng, kơpong kuăn pơlê hdrông kuăn ngo ƀă kong ngo ai tíu ki kal ‘na cheăng kâ rêh ối pơlê pơla, gâk kring tơnêi têa, kring tơniăn, kong prâi loăng pơlái kong kế ƀă tơdroăng tơrŭm tâi tâng hdrông mơngế. Pêi cheăng kơpong kố cho xiâm kối vâ mơnhông ki kal laga xuân ai hên tơdroăng pá puât ‘na tơdroăng ‘nâi klê hriâm, kih năng tơdroăng cheăng, nâl xuăn, hngêi trăng troăng klông, tơdroăng kơchơ mơdró, tơdroăng ki châ hnê mơjiâng, tơdroăng ăm mung liăn, pro mơ-éa tăng cheăng pêi; pơkâ thế, thế mơjiâng cheăng pêi krá tơniăn kơpong kuăn pơlê hdrông kuăn ngo ƀă tơdroăng mơnhông ivá kơdroh kơtiê krá tơniăn ƀă rak khôi túa lĕm tro xua tăng cheăng pêi krá tơniăn dêi kơpong kuăn pơlê hdrông kuăn ngo ôh tá xê to troăng hơlâ pêi cheăng mê ối cho troăng hơlâ hdrông kuăn ngo, troăng hơlâ kơdroh kơtiê, troăng hơlâ mơjiâng mơngế ƀă pro krá tơniăn tơdroăng loi tơngah dêi kuăn pơlê.