Mơnhên Việt Nam đi đo nhuô̆m kong têa Mih cho khu tơrŭm ai râ kal khât tung troăng pêi cheăng ton xŏn má môi, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế péa pâ pơtối pêi pro châ tơƀrê tơdroăng Khu tơrŭm cheăng ton xŏn Tâi tâng, mơdêk tơrŭm cheăng lêng, tơtro ƀă tơdroăng kal vâ ƀă ki pơxúa dêi rêm tơnêi têa.

Tối rơdêi ki kơnâ dêi tơrŭm rơnêu kế tơmeăm khoăng xua tơplâ tơplong, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế Mih rak ƀă po rơdâ mâu tơdroăng tơkêa bro tah lôi trếo ‘mêi dioxin, ti tăng ƀom min, tŏng gum mơngế chó chêng tơvê kŏng; thăm hnê kŏng ngê̆, tơbleăng tơdroăng kal ƀă tơmeăm ki tơbâ gum tung tơdroăng ti tăng, mơnhên inâi kơxêng kiâ mô đô̆i hlâ tung tơplâ xâ Việt Nam.

Pôa Hùng Cao, Pôu râng tâi tâng hnoăng Ngế xiâm mơnhên Mih nhuô̆m tơrŭm cheăng ƀă Việt Nam, môi tuăn môi Việt Nam ó rơdêi, tơniăn krê, mơ-eăm xêh ƀă pói vâ pơtối po rơdâ tơrŭm cheăng pơla péa pâ, kơpong ƀă lâp plâi tơnêi.