A hôp tơno tơdroăng kal, mâu kăn teăng mâ hiăng tơmâng tơbleăng ƀă tơpui tơno ‘na tơdroăng cheăng kâ – rêh ối pơlê pơla khế 6 ƀă 6 khế apoăng hơnăm 2026; tơdroăng xing xoăng, mơ’no liăn cheăng tơnêi têa, pêi pro tơdroăng xiâm tơnêi têa, mơnhên tơdroăng pêi pro liăn ngân tơnêi têa 6 khế apoăng hơnăm 2026; ‘na tơdroăng hnê mơhno, pơkuâ dêi Chin phuh, Ngế pro xiâm hnê ngăn Chin phuh khế 6 ƀă 6 khế apoăng hơnăm; hnoăng cheăng xiâm kal tơkŭm hnê mơhno tung la ngiâ; ‘na tơdroăng hbrâ hơnăm hriâm nếo 2026 – 2027 ƀă mâu tơdroăng xiâm ki ê.

6 khế apoăng hơnăm 2026, tơdroăng cheăng kâ kân tơniăn. Tơtêk cheăng kâ pơtối rak. GDP 6 khế apoăng hơnăm tâk 8,39%, djâ kơlo tơtêk 6 khế tâk 8,18%. Xông tơpui a rôh hôp, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối, tơnêi têa dế ai roh tơ’lêi mơnhông mơdêk kân, laga rôh tơ’lêi hlâu bu chiâng khât păng ‘nâng drêng lâp tơnêi têa khŏm mơ-eăm hên, tơmiât tro, troăng pơkâ hlâu lĕm, khu râ kăn pêi cheăng châ tơƀrê, kăn ƀô̆ khên pêi, khu tê mơdró ó rơdêi, kuăn pơlê môi tuăn, xua mê, ihiâm mơno tơdjuôm cho thế khŏm mơ-eăm hên, pêi pro rơdêi tâ, tơkŭm pêi pro kơtăng tâ; rế mơ-eăm pêi kêi đeăng mâu pơkâ tung hơnăm 2026, rế mơjiâng xiâm kối krá tơniăn ăm hơnăm 2027 ƀă tá hneăng mơnhông mơdêk nếo dêi tơnêi têa.