A rôh pêi cheăng mâu kăn hiăng tơpui tơno ‘na mâu troăng hơlâ pơkâ pêi mơjiâng pro 2 tơdroăng Pơkâ ki kal dêi Tơnêi têa mê cho Pơkâ ‘na pơhlêh nếo túa mơnhông Tơnêi têa ngăn tung khoa hok kong ngê̆, pơhlêh nếo tơmiât pêi rơkê, pơhlêh kơxô̆ ƀă Pơkâ ‘na mơnhên túa pơkâ thăm mơnhông nếo. Kố pơrá cho mâu tơdroăng tung la ngiâ, ki kal ƀă kal pêi tơdrêng vâ tơbleăng pêi Pơkâ Hneăng hôp Đảng lâp tơnêi têa rôh 14 la ngiâ.

Pôa Tô Lâm, Kăn xiâm pơkuâ hnê ngăn cheăng Đảng mơnhên tối khât mâu tơdroăng pêi pro tơƀrê tung hriăn ngăn apoăng dêi Khu cheăng troăng hơlâ tŏng gum ƀă Cheăng tung la ngiâ Tơnêi têa cho chía vâ tŭm, tơdrêng amê hlối pơkâ pêi ‘na mâu tơdroăng ƀă hnoăng cheăng tung la ngiâ tung tơdroăng mơjiâng 2 Pơkâ kố. Kăn xiâm pơkuâ hnê ngăn cheăng Đảng tối tiah kố, kố cho troăng prôk ki pơklât athế pêi pro pơhlêh 2 tơdroăng pêi 100 hơnăm dêi Tơnêi têa, mơjiâng môi tơnêi têa Việt Nam hơniâp lĕm, tơniăn kro rơdêi, rơkê, mâu pơkâ kố ‘na mơnhông pơrá athế pơkâ pêi tung tâi tâng.