Kơxê hâi lơ 29/12 a Hà Nội, pôa Tô Lâm, Kăn xiâm pơkuâ hnê ngăn Đảng lăm pôu hlối pơkuâ rôh pêi cheăng ƀă Tíu xiâm chêh ‘măn rak tơdroăng kal tơnêi têa kơxô̆ 1. Châ mơjiâng sap apoăng hơnăm kố, nôkố Tíu xiâm chêh ‘măn rak tơdroăng kal tơnêi têa kơxô̆ 1 hiăng pê klêi tơdâng kơxô̆ ki hên tơdroăng chêh ‘măn rak ngăn tơnêi têa ƀă mơnhông cheăng kâ - pơlê pơla.

Khu xiâm rak ngăn tơdroăng kal dêi tơnêi têa dế pêi cheăng tơkŭm tiô troăng vâ chiâng “Tíu pêi cheăng môi péa kơxô̆ tơkŭm môi’’, kum pro hlâu tơdroăng pro hlá mơ-éa chêh ‘măn tung kơmăi ki hiăng ai hlâu... A rôh pêi cheăng, pôa Tô Lâm khĕn kơdeăn mâu tơdroăng hiăng pêi pro, hnoăng cheăng pêi tơƀrê ki Khu xiâm Kong an, mâu Khu xiâm, kơvâ cheăng ki tơdjâk troh ƀă tâi tâng mâu kăn ƀô̆, mâu lêng Tíu xiâm chêh ‘măn rak tơdroăng kal tơnêi têa hiăng pêi châ tung pơla hdrối kố hía nah.

Kăn xiâm pơkuâ hnê ngăn Đảng xuân tối nhên, 3 tơdroăng pá kân má môi xuân cho 3 tơdroăng “ki pá” kal thế mơ-eăm tơkâ luâ xơpá; Mế cho tơdoăng ki chêh ‘mot tung kơmăi; tơdroăng pơ’lêh nếo hriăn plĕng ki nếo ngăn a tơdroăng chêh ‘mot; kơlo vâ pơkuâ ngăn pêi pro dêi ‘na kŏng ngê̆ ki xiâm gá  ƀă mơngế pêi cheăng rơkê ôh tá ai hên.

Kăn xiâm pơkuâ hnê ngăn Đảng pơkâ thế, Tíu xiâm chêh ‘măn tơdroăng kal tơnêi têa hnê kơtăng, tơbleăng pêi tro 5 troăng vâ pêi ki kân, tung mê tơkŭm mơjiâng Tíu xiâm chêh ‘măn tơdroăng kal tơnêi têa  kô chiâng “plâi nuih” dêi cheăng kâ  chêh ‘mot tung kơmăi, tơdroăng rêh ối pơlê pơlê chêh ‘mot tung kơmăn;  cho “ngoâ’’ pơtối hnê pêi tơdrêng, pêi tơdrê tơdroang cheăng pơkuâ hnê mơhno dêi mâu kăn, hnê mơhno pơkuâ djâ dêi Đảng, Tơnêi têa ƀă hên tơdroăng rêh ối pơlê pơla.