A roh tơdah, pôa Tô Lâm, Kăn xiâm pơkuâ hnê ngăn Đảng mơnhên Việt Nam đi đo ngăn Rusi cho môi tung mâu khu tơrŭm cheăng kơjo má môi tung troăng hơlâ tơpui kâ ƀă kong têa ê. Việt Nam pói vâ rak tơrŭm cheăng tiô khôi vâi krâ nah, kum ăm pơxúa dêi péa hdroâng mơngế, kum rak hơniâp lĕm, tơrŭm ƀă mơnhông mơdêk a péa kơpong ƀă tung lâp plâi tơnêi.

Vâ pơtối mơdêk ki châ tơƀrê tơrŭm cheăng pơla péa pâ, ki rơhêng vâ tối tung hơnăm 2025 klăng leh tơbâ 75 hơnăm mơjiâng tơrŭm tơpui kâ ƀă kong têa ê, pôa Tô Lâm, Kăn xiâm pơkuâ hnê ngăn Đảng pơkâ thế péa pâ pơtối thăm tơpui tơno khu râ kăn xiâm; tơrŭm cheăng krá tơniăn a mâu hneăng hôp tơpui tơno hên pâ; pêi pro châ tơƀrê Tơdroăng pơkâ tê mơdró tơ’lêi hlâu xua Việt Nam - Khu tơrŭm Cheăng kâ Á – Âu; mơnhên mâu troăng pêi la ngiâ, troăng pêi ƀă tơdroăng tơkêa bro tơrŭm khoa hok ki xiâm, khôi túa lĕm tro – ngê̆ thuât ki rơkê plĕng.