Kơxê lơ 18/7, pôa Trần Hồng Hà, Ngế pro xiâm phŏ hnê ngăn tơnêi têa tơdah jâ Angela Pratt, Kăn teăng mâ Khu tơrŭm cheăng ngăn pơkeăng ƀă khăm pơlât lâp plâi tơnêi WHO. Pôa Trần Hồng Hà rơkâu hneăng cheăng nếo dêi jâ Angela Pratt a Việt Nam ƀă kheăn kơdeăn hnoăng tơrŭm dêi Khu tơrŭm cheăng lâp plâi tơnêi tung pơla lâp plâi tơnêi trâm hên tơdroăng pơloăng mơnúa ‘na pơreăng.

Tung mê, tơdroăng tŏng kum dêi WHO kum Việt Nam châ tơƀrê tung tơdroăng tơplâ mơdât COVID-19 ƀă chiâng môi tung kong têa rĕng lôu péa klêi kơ’nâi tâi pơreăng. Tơpui tơno ‘na tơdroăng kal vâ châ mâu tơmeăm khăm pơlât, pơkeăng, tơmeăm ‘na pơkeăng, vaccine dâi lĕm, yă tê tơtro, pôa Trần Hồng Hà pơkâ thế Khu tơrŭm ngăn pơkeăng ƀă khăm pơlât lâp plâi tơnêi pơtối tŏng kum hên ăm Việt Nam, ki má lối cho mâu vaccine tá hâi tŭm tung tơdroăng pâk po rơdâ. Jâ Angela Pratt mơnhên,

WHO ƀă Chin phuh Việt Nam hiăng ai tơrŭm cheăng krá tơniăn, châ tơƀrê tung môi pơla ton, kố cho xiâm kối ki kal vâ péa pâ pơtối tơleăng mâu tơdroăng pá puât tung kơvâ ngăn pơkeăng ƀă khăm pơlât nôkố. Tung la ngiâ, WHO kô pơtối tơrŭm krá tơniăn ƀă Khu xiâm pơkuâ ngăn pơkeăng ƀă khăm pơlât vâ kum ‘na châ rôe vaccine ối tung tơdroăng pâk po rơdâ.