Tiô tối tơbleăng, kong măng lơ 17, kơxo lơ 18/7, khía mơhot rôh má 1 hiăng plong mot a tơnêi têa pin. Kố cho khía mơhot ki têi tung pơla 5 hơnăm vêh ngi kố. Hbrâ ví ƀă khía mơhot, sap ing 12 chôu hâi dế lơ 17/7, mâu kong pơlê Quảng Ninh, Nam Định pêi pro tơdroăng ki mơdât lo lăm a têa kơxĭ, tơdrêng amê hlối pơtê hlối tơdroăng ki pơto chơ, tơdah xo mâu tơmối ôm hyô a mâu kơpong ôm hyô.

Klêi kơ’nâi séa ngăn a mâu kơpong ki rơ-iêo ƀă a mâu tíu ki păn ká xi xŏng tung tơdrong dêi mâu kong pơlê, tiô tối hdrối kô ai vâ chê 30 rơpâu ngế kal châ ‘mâi xĕn troh tíu tơniăn. Khu lêng Kuân khu 3, Kuân khu 4 hiăng ƀă dế tơkŭm kum kuăn pơlê rak ngăn dêi hngêi trăng; ‘mâi xĕn mâu tơdrong ki păn ká xi xŏng; tối tơbleăng ăm mâu plong tuk lăm troh ối a tíu tơniăn ƀă xing xoăng mâu plong tuk mâu tíu tot.

Mơgêi rôh hôp, pôa Trần Lưu Quang tơmâng xo mâu tơdroăng ki hbrâ rơnáu dêi mâu kong pơlê tung tơdroăng ki hbrâ rơnáu hbrâ ví ƀă khía mơhot têa kân lân lu, tơdrêng amê hlối pơkâ thế mâu Khu xiâm, kơvâ cheăng ƀă kong pơlê pôi tá tơngôu, athế pêi pro kơtăng tiô tơdroăng pơkâ thế dêi Ngế pro xiâm hnê ngăn Chin phuh ‘na tơdroăng ki hbrâ ví khía mơhot têa kân lân lu rôh má 1.