Tơpui a Rôh hôp má 44 dêi Vi ƀan pơkuâ Kuô̆k hô̆i, pơxiâm po a kơxo lơ 14/4, Kăn xiâm hnê ngăn Kuô̆k hô̆i ăm ‘nâi, kô ăm rơkong tơpui tối, séa ngăn, pơkâ 42 khu tơdroăng ki kal; ‘mâi pơhlêh, ‘mot tơ’nôm mâu tơdroăng dêi Luât hơnăm 2013; ngăn mâu tơdroăng ki ối tung hnoăng pơkuâ vâ rĕng tŏng gum xơpá, tơvâ ăm mâu khu mơdró kâ. Malối, Vi ƀan pơkuâ Kuô̆k hô̆i kô ăm rơkong tơpui ‘na hồ sơ pơkâ thế: ‘mâi pơhlêh, ‘mot tơ’nôm mâu tơdroăng dêi Luât hơnăm 2013; mơjiâng Vi ƀan hlá mơ-éa chêh pro ‘mâi pơhlêh, ‘mot tơ’nôm mâu tơdroăng dêi Luât hơnăm 2013; xo rơkong tơpui tối dêi Kuăn pơlê ‘na kơxop hlá mơ-éa ‘mâi pơhlêh, ‘mot tơ’nôm mâu tơdroăng luât hơnăm 2013 tung pơla 1 khế. Pôa Trần Thanh Mẫn, Kăn xiâm hnê ngăn Kuô̆k hô̆i tối nhên, tơdroăng ki ‘mâi pơhlêh luât cho hnoăng cheăng ki kal ƀă kơxô̆ ki hên tơdroăng cheăng, tơdjâk troh hnoăng cheăng pôu râng dêi hên kơ koan khu tơrŭm, tro ƀă troăng pơkâ pro tơkŭm iâ kơ koan cheăng dêi khu pơkuâ tơdroăng kal kí, tiô Mơgêi 126, 127 dêi Khu xiâm pơkuâ tơdroăng kal kí ƀă Khu hnê mơhno cheăng Tơnêi têa.

Tung pơla po Hneăng hôp, Vi ƀan pơkuâ Kuô̆k hô̆i athế pêi klêi tơdroăng séa ngăn, tơbleăng mâu pơkâ xing xoăng, tơkŭm khu pêi cheăng tơrŭm cho tíu pêi cheăng râ cheăng; tơdrêng amê hlối ăm rơkong tơpui tối vâ pơtroh ăm Kuô̆k hô̆i tơbleăng pơkâ ‘mot tơkŭm mâu tíu pêi cheăng râ kong pơlê ƀă kô klêi mâu tơdroăng pơkâ tiô Hnoăng cheăng pêi sap ing khế 4 troh khế 6 hiăng châ pơkâ.