Tơpui pơxiâm po Rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i ăm ‘nâi, kố cho rôh hôp apoăng dêi khế 1/2026, rôh hôp po tung pơla lâp tơnêi têa dế koh hâk Hneăng hôp lâp tơnêi têa rôh má 14 ƀă Tơbâ 96 hơnăm hâi mơjiâng Đảng Kŏng san Việt Nam; tơdah Têt khôi hmâ dêi hdroâng mơngế. A rôh hôp, pơchuât tơbleăng dêi Vi ƀan tiô kuăn pơlê vâ ƀă Séa ngăn ăm ‘nâi, kuăn pơlê pơtối tối loi tung pơkuâ dêi Đảng tung tơdroăng djâ tơnêi têa mơnhông, pêi pro ƀlêi chiâng mâu tơdroăng pơkâ pêi; mơnhên tối khât tơdroăng tơrŭm Kuô̆k hô̆i ƀă Chin phuh tung mơjiâng luât, khu pơkuâ cheăng ƀă tơbleăng pêi pro, chiâng tơdroăng môi tuăn, tơƀrê tung pơkuâ ngăn tơnêi têa.

Kăn xiâm hnê ngăn Kuô̆k hô̆i pơkâ thế Vi ƀan Kuăn pơlê vâ, séa ngăn rơtế ƀă mâu kơvâ cheăng séa ngăn yă tê tơmeăm, mâu tơmeăm xúa ki kal tung rôh Têt khôi hmâ Bính Ngọ vâ pro tiah lâi ăm tơniăn, tŭm ăm kuăn pơlê; tơtrŏng tơdroăng gâk kring, kal kí, tơniăn tung pơlê pơla hdrối, tung, klêi kơ’nâi Hneăng hôp Đảng ƀă Têt khôi hmâ.