Hâk mơnê ƀă koh tơdah Ngế pro xiâm hnê ngăn kong têa Malaysia roh apoăng lăm troh a Việt Nam drêng pôa cho Ngế pro xiâm hnê ngăn, mê Kăn xiâm hnê ngăn tơnêi têa pin tối nhên hneăng lăm pôu mê hiăng kum mơjiâng tơdroăng ki nếo ăm tơdroăng tơrŭm cheăng ki trâm mâ pơla peá pâ.

Rơkâu hâk kơ Chin phuh Malaysia hiăng pơkâ pêi pro ƀlêi chiâng mâu troăng tơdjâ tung mơnhông pêi cheăng kâ, rêh ối pơlê pơla, Kăn xiâm hnê ngăn tơnêi têa loi tơngah, Malaysia kô pêi pro mâu tơdroăng ki ƀlêi chiâng Tơdroăng pơkâ 5 hơnăm roh má 12 ƀă hnoăng cheăng ton xŏn, trâu rơdâ dó inâi Malaysia Madani, kum tơnêi têa mơnhông krá tơniăn ƀă kro mơdrŏng, ai hnoăng cheăng ƀă kơlo ki rơkê rế hía rế tơtêk a’ngêi tung kơpong ƀă tung lâp plâi tơnêi.

Péa ngế kăn xiâm hiăng hâk kơdeăn thăm mơdêk tơrŭm cheăng péa kơvâ ‘na Đảng, Tơnêi têa, Chin phuh; thăm mơdêk tơrŭm kring vế, gak ngăn, cheăng kâ, tê mơdró, mơ’no liăn, hnê hriâm, ôm hyô, túa lĕm tro, trâm mâ, tơpui tơno pơla kuăn pơlê.