Kơxê hâi lơ 19/7, a Vi ban tơring Côn Đảo, pôa Võ Văn Thưởng, Kăn xiâm hnê ngăn tơnêi têa trâm mâ kăn teăng mâ Khu kăn tơpui ‘na mâu tơdroăng cheăng mố đô̆i Kăch măng Việt Nam ki tro xâ rup kroăng phak nah ƀă 76 ngế kroăng phak xua tơdroăng kal kí Côn Đảo teăng mâ ăm lối 5.000 ngế kăn ƀô̆, mâu lêng kăch măng troh xâ rup kroăng, vâ kơ êng hơlêm, mơhnhôk ƀă mơhno hnoăng veăng ‘no, tơplâ ta troh hlâ hnoăng kân kĭn dêi mâu lêng kăch măng, mâu lêng khên tơnôu ƀă mâu kuăn pơlê pâ nhoăm tơnêi têa, xua tơdroăng cheăng pro tơleăng lĕm hdroâng mơngế.

A rôh trâm mâ, mâu kăn hiăng tơbâ mâu tơdroăng tung pơla trâm pá puât tơplâ khên tơnôu dêi mâu lêng kăch măng khên tơnôu, mơhé tro xâ ‘nêk mơ'nêa tôu pâm ó khât, thế hơ’lêh ƀă mơheăm chhá kơxêng tơná, tơdroăng ki hlâ rêh, la tung hiâm tuăn xuân ối rak ki khên tơnôu dêi kăch măng. Klêi hên hơnăm vêh troh a Côn Đảo, hên ngế ki tro kroăng phâk kal kí akố nah tối tơdroăng phiu  ro châ hlo ki ‘’hiăng hơ’lêh phá tơ ê” dêi tíu  ki ngăn môi tiah “on hơmât a rŏng tơnêi”, tíu ki tơrêm kóu hmốu, tơkâng loăng, rơmôe nhâ kơbâng hơnăm ki mê nah krêa to mơheăm chhá dêi mâu lêng kăch măng ki khên tơnôu.

Tối tơbleăng a rôh trâm mâ, pôa Võ Văn Thưởng, Kăn xiâm hnê ngăn tơnêi têa pơtroh rơkong kơ-êng hơlêm, mơnê khât kơ mâu ngế ki troh rup kroăng phak nah xua tơdroăng kal kí Côn Đảo; ăm ‘nâi mâu hơnăm kô hía nah, Đảng, Tơnêi têa đi đo tơmâng khât troh tơdroăng rêh ối  ƀă lối 9 rơtuh ngế ki ai hnoăng; pơtối mơdêk tơdroăng cheăng mơnê kơ mâu ai hnoăng tơnêi têa, malối cho tơdroăng tăng tơkŭm ‘mế kơxêng mâu lêng kăch măng ki hlâ, ‘mâi rơnêu pro mơgrúa lĕm mâu ilâng kiâ, pro lĕm a mâu tơnâp, mơhno tơdroăng ki pâ kơ mâu ai hnoăng “khoh ai tơdroăng rêh hâi kố kơnôm hnoăng vâi krâ roh nah”.

Kơxêi hâi ki mê, Kăn xiâm hnê ngăn tơnêi têa hiăng lăm ngăn Tíu mơđah tơbleăng um tơmeăm Côn Đảo ƀă Tíu tơbâ Tíu kroăng phâk Phú Hải.