Hâi lơ 17/7, pôa Vương Đình Huệ, Kăn xiâm hnê ngăn Kuô̆k hô̆i rơtế ƀă mâu kăn hiăng pêi cheăng ƀă mâu kăn Đảng pơkuâ hnê ngăn kong pơlê Quảng Trị. Klêi 34 hơnăm mơjiâng kong pơlê, Quảng Trị dế chôa pơ’lêh nếo ƀă xông tơƀrê. Quảng Trị dế mơ-eăm tâ nếo, cheăng kâ rế po rơdâ, veăng ‘no hnoăng mơnhông tơdjuôm tơnêi têa.

Ki tâk dêi tơmeăm pêi lo tung kong pơlê (GRDP) tâng riân pơla hơnăm 2021-2022 châ 6,9% tung hơnăm, 6 khế apoăng hơnăm 2023 tâk 6,52%. Xo liăn ngân ăm hngêi rak liăn tơnêi têa hơnăm 2021 châ 160% tiô tối hdrối ƀă hơnăm 2022 châ 113% tiô tối hdrối. Tơdroăng tơbleăng Pơkâ kơxô̆ 43 dêi Kuô̆k hô̆i ‘na luât pơkâ tài khóa, liăn ngân kơjo kum Tơdroăng ‘mâi mơnhông ƀă mơdêk cheăng kâ - rêh ối ƀă Pơkâ kơxô̆ 11 dêi Chin phuh ‘na Tơdroăng ‘mâi mơnhông cheăng kâ - rêh ối châ  tơbleăng pêi kơhnâ khât.

Tối tơbleăng mơgêi a rôh pêi cheăng, pôa Vương Đình Huệ, Kăn xiâm hnê ngăn Kuô̆k hô̆i pơkâ thế Đảng ƀô̆ kong pơlê kal pro klêi hồ sơ pơkâ dêi kong pơlê Quảng Trị tung pơla hơnăm 2021-2030, vâ tí tăng pêi mâu tơdroăng cheăng, pơtối pêi lo tơmeăm khoăng ki  hiăng ai hlâu hlối pơxúa dêi kong pơlê; tối nhên troh tơdroăng “púi vâ hơniâp lĕm” a Quảng Trị, Kăn xiâm hnê ngăn Kuô̆k hô̆i tối, cho tơnêi ki chiu pôu pá ai hên răng pháu, ƀom min xua tơplâ ó tung 2 rơxông plâ xâ dêi hdroâng mơngế pin, Quảng Trị cho tíu ki tơtro vâ tối tơdroăng “púi vâ hơniâp lĕm”.