Pôa Vương Đình Huệ, Kăn xiâm hnê ngăn Kuô̆k hô̆i tối nhên, Việt Nam ngăn nhuô̆m ƀă khŏm mơ-eăm mơdêk tơrŭm cheăng tung la ngiâ ƀă Malaysia rế hía rế trâu rơdâ, ai pơxúa ƀă tơƀrê. Tung tơdroăng tơrŭm cheăng kal kí ki tơniăn lĕm ƀă tơngah dêi rơpó, pôa Vương Đình Huệ, Kăn xiâm hnê ngăn Kuô̆k hô̆i prếi pôa Anwar Ibrahim, Ngế pro xiâm hnê ngăn kong têa Malaysia hiăng tơpui tơno tơdrăng ‘na hên kơvâ cheăng tơrŭm pơla péa tơnêi têa tung la ngiâ, mơdêk pêi klêi tâi tâng mâu tơdroăng tơkêa tơrŭm cheăng ki kal pơla péa tơnêi têa.

Péa pâ tối nhên ki kal dêi tơdroăng thăm mơdêk tê mơdró pơla péa pâ tiô troăng bro tơdâng tâ; tơrŭm séa ngăn, hriăn plĕng, mơjiâng troăng hơlâ mơdêk tơrŭm cheăng tung tơnăng ká xi xŏng a têa kơxĭ ƀă tê ká xi xŏng xua kố cho kơvâ cheăng ki péa pâ ai tơdroăng ki rơhêng vâ ƀă mơni kô ‘mot tơ’nôm ăm dêi rơpó; môi tuăn tơrŭm cheăng, tŏng kum khu mơdró kâ a Việt Nam ‘na kơvâ cheăng ƀă kơmăi kơmok kế kâ Halal ki Malaysia ai rơdêi ƀă Việt Nam ai hên rôh tơ’lêi. Ngế pro xiâm hnê ngăn kong têa Malaysia môi tuăn séa ngăn, mơdêk roê ‘mot mâu kế tơmeăm dêi Việt Nam.