Xông tơpui a roh hôp, pôa Vương Đình Huệ, Kăn xiâm hnê ngăn Kuô̆k hô̆i pơchân tối, Hô̆i đong kong pơlê Quảng Trị kal pơtối hlê plĕng trâu hơngế ƀă inhên, tơkŭm po pêi pro lĕm tro mâu Pơkâ dêi Đảng, mâu pơkâ dêi Tơnêi têa, Pơkâ hneăng hôp má 5 Kuô̆k hô̆i hneăng má 15 nếo châ tơbleăng ăm pêi pro i nhên chiâng Pơkâ dêi Hô̆i đong kuăn pơlê kong pơlê tung kơvâ cheăng.

Pơtối hơ’lêh nếo ó rơdêi, mơdêk ki dâi lĕm, châ tơƀrê tơdroăng pêi cheăng dêi Hô̆i đôong kuăn pơlê tung tơdroăng pơkâ mâu tơdroăng ki kal dêi kong pơlê. Tơkŭm tah lôi mâu tíu ki kreăng, tơvâ tơvân hiăng châ tối nhên, pơtối pêi kêi đeăng troăng pơkâ vâ mơjiâng mơnhông kong pơlê Quảng Trị, thăm pêi pro rĕng mâu tơdroăng tơkêa bro mơ’no liăn cheăng tơnêi têa, hngêi trăng troăng klông, cheăng kâ pơlê pơla, ki má lối cho mâu tơdroăng tơkêa bro ki xiâm, ki kal dêi kong pơlê; mâu tơdroăng pơkâ xiâm tơnêi têa, tơdroăng pro tơniăn ƀă mơnhông mơdêk cheăng kâ.