Mâu hâi ki kố, lăm a drô mâu troăng prôk a An Nhơn Bắc, trâm hlo um méa kuăn pơlê dế rak ngăn, pơhlêh kơ’lo ƀă kriê hlá reăng mai. Kố cho hneăng pêi ki kal, pơkâ rôh tơpo reăng ƀă ki kơnía dêi xiâm reăng mai rôh Têt. Ngoh Ngô Văn Hào, Tôh kơphô̆ Trung Lý, bêng An Nhơn Bắc, ngế ki hiăng lối 15 hơnăm cheăng pêt reăng mai, ăm ‘nâi, rơpŏng ngoh nôkố ai lối 3 rơpâu xiâm reăng mai tŭm túa, ki hên cho reăng mai Giáng Long, reăng mai pơklĕp tơkâng ƀă mai bonsai.

“Hneăng ki kố mâu khu pêi kơdrum dế klâ xoăng ‘măn chôu dêi mâu xiâm reăng, rah xo mâu xiâm ki lĕm vâ ‘măn chôu, xiâm ki lâi ôh tá dâi hơnăm kơ’nâi ah tê, nôkố vâi krâ kuăn pơlê hiăng pơtroh reăng mai troh mâu kơchơ tơkŭm hên a kơpong tâ tá Vi ƀan hnê ngăn bêng hiăng pơkâ vâ tê ăm mâu khu roê hên. Nôkố mâu khu pêi kơdrum xuân dế pơhlêh mâu kơ’lo reăng mai vâ rak ngăn pro lĕm ăm xiâm reăng mê nôkố vâi krâ nhŏng o dế pêi kơhnâ”.

Rơtế tơdjuôm hâi pêi cheăng rĕng, ngoh Ngô Minh Trí, Tôh kơphô̆ Trung Lý, bêng An Nhơn Bắc, ai dâng 2 rơpâu xiâm reăng mai ki kân kŭn, tiô tối hdrối kố djâ troh a kơchơ vâ chê 600 xiâm tung rôh Têt kố. Ngoh ăm ‘nâi, klêi kơ’nâi kong mê têa kân, cheăng rak ngăn reăng mai pâ thế hên cheăng hên ivá tâ, la kơnôm kong prâi tơniăn lĕm, loăng xông lĕm tơniăn. Xuân tiô ngoh Trí, mâu hơnăm achê kố, tơdroăng ki vâ roê reăng ma bonsai rế hía rế châ vâi hâk vâ tâ xua gá lĕm, tơ’lêi mơđah.

“Nôkố dế rak ngăn loăng ƀă gêi hlá liăn tê cho sap ing 500 rơpâu tơngi klêng troh 1 rơtuh môi xiâm. Bonsai pin pŏng gá tơ’lêi mê ‘măn a kơƀeăng pêi cheăng cho ki xiâm, reăng mai mê hên la nôkố bonsai châ vâi hâk vâ hên má môi. Pêi túa reăng kố hmâ sap ing mái Giáng long lơ mai lùm mê ah poê tah xúa kih thuât vêh pro mê gá chiâng sap ing to lâi hơnăm ah hiăng ai reăng ma bonsai”.

Tung pơla mê, ƀă mâu khu ki pêi kơdrum ki hiăng ton hơnăm, tơdroăng pơhlêh ki vâ xúa xuân pơkâ hên ki pá puât. Pôa Lê Văn Tuấn, bêng An Nhơn Bắc, ngế ki hiăng lối 40 hơnăm cheăng pêt reăng mai, nôkố ai dâng 500 xiâm reăng mai giáng long, tung mê hên xiâm hiăng lối chât hơnăm.

“Reăng mai tê a kơchơ nôkố gá hên tâ hdrối nah, nah gá iâ tâ, nah pêt tiô pêt giáng long hên. Nah ôh ti ai reăng mai vâ tê mê nôkố pêt hên hĭn tê chiâng hrá tâ. Reăng mai á pêt mê 20 hơnăm ai 30 hơnăm ai, iâ má môi tung kơdrum xuân châ 6 hơnăm, nôkố pơhlêh ôh tá chiâng, hơnăm á hiăng hên ôh ti xê pro 1 xiâm bonsai pro chiâng hlối ôh”.

Bêng An Nhơn Bắc, kong pơlê Gia Lai mơjiâng tung tơdroăng ‘mot tơkŭm mâu bêng, cheăm dêi pơlê kong krâm An Nhơn, kong pơlê Bình Định ton, nôkố ối tung kong pơlê Gia Lai. Kố châ ngăn cho kơpong pêt reăng mai kân ƀă châ vâi ô eăng dêi kơpong peăng Tơdế ƀă lối 450 rơpŏng kuăn pơlê, ƀăng tơnêi pêt lối 146 ha, pro pơxúa châ liăn lối 100 rơtal rêm hơnăm.

Kong mê khía mơhot kân rôh má 13 (khế 11/2025) hlối ai kong mê kân hiăng pro tơ’nhiê hên tơmeăm khoăng kơpong pêt reăng mai ki hên dêi Gia Lai, tung mê ai bêng An Nhơn Bắc. Têa hiăng lu hên hĭn kơdrum reăng mai, bu ối to xiâm doăng to trâp tơnêi, rêi gá ŭm, tơkâng hlá tơruih. Laga, klêi kơ’nâi têa xoê, mâu ngế ki pêt reăng mai tíu kố hiăng pơxiâm ‘mâi pêt. Tơrêm kơdrum reăng mai châ po pông tơnêi, poê tah tơkâng ki hiăng khăng răng, rak ngăn rêi. Mâu xiâm loăng mai ngăn môi tiah pá vâ kâi rêh mê nôkố hiăng rế hía rế hlo drêh ngiât, tơxui reăng lĕm tơvó, koh tơdah Hơngui nếo ƀă djâ vế tơdroăng tơngah ‘na môi rôh Têt ai tŭm tơdroăng.

Pôa Đinh Thanh Trình, Phŏ kăn hnê ngăn Vi ƀan bêng An Nhơn Bắc, ăm ‘nâi, kong mê khía mơhot hdrối nah hiăng pro dâng 120.000 xiâm reăng mâ hlâ, tiô riân lŭp lối 80 rơtal liăn. Hlo ki khât kố, ăn pơkuâ cheăm hiăng tơbleăng pêi hên troăng hơlâ tŏng gum kuăn pơlê ‘mâi mơnhông dêi reăng mai.

“Vâ pro tơ’lêi hlâu ăm vâi krâ kuăn pơlê pêt ƀă tê reăng mai rôh Têt tíu pêi cheăng hiăng pêi pro hên troăng hơlâ tŏng gum tung mê ôh tá nâp liăn mung tíu, pro tơ’lêi hlâu ai troăng ăm rơxế prôk dêi mâu kong pơlê Hdroh – Kơnhŏng troh roê reăng mai, pro tơ’lêi hlâu ăm tơmối troh roê reăng mai dêi bêng. Tơdrêng amê hlối ai mâu troăng hơlâ kơjo gum tí tăng ‘nâi plĕng ăm râ kơpêng, hngêi rak liăn hdró chĕn lơ ăm mung ƀă liăn laih rơpâ vâ vâi krâ kuăn pơlê tơ’lêi hlâu ƀă ai liăn vêh pêt reăng”.

Tung mâu kơdrum reăng mai dế mot tung rơnó, idrâp toi poê tơkâng, idrâp xôh têa rơtế ƀă tôu mâ hâi mơ’nui hâi hiăng pro chiâng um kơchuâ pêi cheăng hơniâp ro, ai to tơdroăng tơngah. Ƀă ngế ki pêt reăng mai An Nhơn Bắc, rơnó reăng mai Têt Bính Ngọ 2026 ôh ti xê cho rơnó tê mơdró, mê ối mơhno ăm tơdroăng krá tơniăn, khên tơnôu tơkâ luâ kong mê khía mơhot, vâ rêm rơnó reăng mai tơpo tro hâi djâ vế môi rơnó Hơngui nếo ƀă hên tơdroăng ki tơngah.