Po Rôh hôp kân má 4, Kuô̆k hô̆i hneăng 15 a kơxo lơ 20/10 a Hà Nội ƀă kô mơgêi a hâi lơ 15/11/2022. Tiô tơdroăng, kơxo kố mâu kăn Kuô̆k hô̆i ‘măn hơvĭng reăng ƀă mot a Hngêi ‘măn poăng Pôa Hồ Chí Minh, Kăn xiâm hnê ngăn tơnêi têa hneăng apoăng hdrối po hôp hbrâ vâ tơpui ƀă têk kŏng tiâ vâ môi tuăn tơbleăng tơdroăng rôh hôp má 4, Kuô̆k hô̆i hneăng 15. Hneăng hôp pơxiâm po 9 chôu kơxo a hngêi hôp kân Diên Hồng - Hngêi Kuô̆k hô̆i (Hà Nội) ƀă châ mơ’no tung rơ’jiu, um tơvi tơdrêng vâ kuăn pơlê tơmâng ngăn vâ ’nâi plĕng.

A rôh hôp, Kuô̆k hô̆i kô séa ngăn, tơbleăng 7 tơdroăng tơkêa Luât: Luât Têa châu (ki ‘mâi hơ’lêh); Luât hbrâ mơdât, tơhôu tôu pâm tung on veăng rơpŏng hngêi (‘mâi hơ’lêh); Luât Séa ngăn (‘mâi hơ’lêh); Luât pêi pro tiô tuăn kuăn pơlê a pơlê cheăm; Luât ‘mâi hơ’lêh, tơ’nôm mâu tơdroăng Luât Tần số vô tuyến điện; Luât Khăm, pơlât (‘mâi hơ’lêh); Luât hbrâ, mơdât pêi lo liăn ôh tá tơdrăng (‘mâi hơ’lêh; Tơdroăng pơkâ tơdroăng kal a rôh hôp Kuô̆k hô̆i (‘mâi hơ’lêh).

Mâu kăn Kuô̆k hô̆i kô tơpui tơno ƀă pơkâ hên tơdroăng kal a rôh hôp má 4

3 tơdroăng chêh Pơkâ xuân châ séa ngăn tơbleăng, mê cho: Tơdroăng Pơkâ mơnúa ăm rah xo xúa biên kơxô̆ ô tô ing tơdroăng tơbleăng yă; Pơkâ mơnúa pro tio mâu luât pơkâ pêi, tơdroăng pơkâ tŏng kum mơnhông pơlê kong kơdrâm Ƀuôn Ma Thuột, kong pơlê Dak Lak. Pakĭng mê, Kuô̆k hô̆i kô pêi pro tơdroăng séa ngăn, tí tăng ngăn nhên, pơkâ mâu tơdroăng ‘na cheăng kâ - rêh ối ƀă mâu tơdroăng kal ki ê dêi tơnêi têa.