A thôn Kon Tun, cheăm Tu Mrông, kong pơlê Quảng Ngãi, pôa A Hai, 50 hơhnăm, cho ngế ki djâ troăng ahdrối tung pơlêh nếo tung túa cheăng kâ vâ mơnhông pêu cheăng kâ mơdêk dêi rơpŏng hngêi. Dế nôkố, pôa ai pơkuâ ngăn dâng 20 ha, tung mê, lối 10 ha kong ki pêt, ki hên cho hdrê loăng Gáo vàng. Pakĭng mê nếo, pôa ối pêt mâu hdrê loăng ‘mốu, plâi hông, loăng xà cừ ƀă hnối păn ro pa kơdâm kong loăng mê, ing mê, pêi lo tơ’nôm iăn ngân. Ôh tá xê to pêi cheăng kâ rơkê, mê pôa A Hai, ối kơhnâ tung mơhnhôk  kuăn pơlê pơhlêh tuăn tơmiât tung pêi chiâk pêi deăng, pơhlêh ing túa pêi pêt kế tơmeăm, hdrê loăng iâ hâi teăng amê pêt hdrê loăng ton hơnăm, hnối rak vế tơnêi tíu:

“Á kơdo mơ-eăm  pêi cheăng kâ vâ mơnhông pêi lo kế tơmeăm, liăn ngân. Drêng pin chiâng pêi kâ mê kuăn ‘nĕng kô pêi pro ƀối. Đảng vên athế djâ troăng ahdrôí, athế prôk ahdrối tung mơnhông pêi cheăng kâ. Akố, á mơhnhôk vâi krâ-nhong o tơkŭm pêi chiâk pêi deăng, êng mơnhên, tối hnê ăm dêi pó túa pêi kâ châ tơƀrê”.

Xuân a cheăm Tu Mrông, nâ Y Khương, 36 hơnăm, Kăn thôn xuân cho Kăn pơkuâ hnê ngăn chi ƀô̆ thôn Ngọc Leng, cho môi tung mâu kăn ƀô̆ ki djâ troăng ahdrối tung hnê mơhnhôk  kuăn pơlê tung pơhlêh pêt hdrê loăng, chôa ‘lâng pêi lo liăn ngân, mơnhông pêi cheăng kâ. Ing hơnăm 2024, nâ  Khương hiăng khên pêt kơphế châ 6 sao. Tâi tâng hdrê kơphế ki mê pơrá kơnôm châ cheăm tŏng gum, kăn ƀô̆ ngăn ‘na kơvâ chiâk deăng ki hnê tối ‘na kih thuât ing tơdroăng chiâ klôh, rơvât phon ta troh a rak ngăn. Klêi kơ’nâi lối môi hơnăm pêi pêt, rak ngăn loăng kơphế hiăng chiâng dâi lĕm. Nâ Y Khương ai tối tiah kố, cho đảng viên athế djâ troăng ahdrối, pêi pro ahdrối tung mơnhông pêi cheăng kâ vâ kuăn pơlê pêi pro ƀối:

“Hnê tối, mơhnhôk kuăn pơlê  pơhlêh tuăn tơmiât-túa pêi cheăng. Loăng kơphế nôkố tâng ai plâi dâi lĕm tê chía châ yă kơnâ, vâi krâ-nhŏng o hlo ki tơƀrê mê xuân khên pêi pro ƀối. Ahdrối nah, pêt pôm loăng la pôm loăng răng hlâ hên. Ing hơnăm 2024, á mơhnhôk vâi krâ-nhŏng o pêt kơphế. Hơnăm 2024, thôn Ngọc Leng ai 24 rơpŏng veăng pêt kơphế; troh a hơnăm 2025 ai tơ’nôm 25 rơpong ki pêt, pêi kơphế chía châ liăn mê kuăn pơlê khŏm mơ-eăm pêt tơ’nôm”.

Ing mâu túa ki pêi cheăng kâ ki nhên a tíu mê,  tiô hiâm mơno ki pơkâ tung tơdroăng rêh ối a cheăm Tu Mrông chôa ‘lâng pêi pro tiô tơdroăng ki pơkâ. Cheăm hiăng vêh mơnhên tơdroăng mơnhông pêi cheăng kâ, pêi lo kế tơmeăm cho hnoăng cheăng ki xiâm, ai tơdjâk troh hnoăng ki kơdroh kơtiê krá tơniăn ƀă mơnhông thôn pơlê nếo.

Tung hneăng hơnăm 2025-2030, cheăm Tu Mrông hiăng pơkâ mơnhên ing tơdroăng ki rêm ngế pêi lo liăn ki vâ iâ 63 rơtuh liăn 1 hơnăm. Vâ khoh châ chiâng pêi pro tơdroăng kố, cheăm hiăg rah xo  kơvâ ngăn ‘na chiâk deăng pro troăng prôk ki xiâm, tung mê, loăng kơphế châ mơnhên tối cho hdrê loăng ki  pêt mơjiâng xiâm. Tung 2 hơnăm apoăng mê nah, cheăm khŏm mơ-eăm mơnhông châ dâng 300 ha loăng kơphế, ing troăng hơlâ ki mơjiâng ƀăng chiâk ƀăng deăng ki pêt hên hdrê kơphế. Pôa Võ Trung Mạnh, Kăn pơkuâ hnê ngăn Đảng ủi cheăm Tu Mrông, kong pơlê Quảng Ngãi tối ăm ngin ‘nâi, cheăm dế pơkâ pêi pro, mơjiâng mah kơpong ki pêt ƀă tơdroăng tơkêa pêi pro inâi kơphế Tu Mrông, vâ la ngiâ ah kô tơxâng vâ châ mơ’no tê dêi kơphế mê.

“Môi tung tơdrốu hnoăng cheăng xiâm, ki pơhlêh pêi pro nếo dêi cheăm mê cho tơdroăng ki hnê ngăn, pơkâ pro rơdêi ing pơhlêh tuăn tơmiât, túa pêi cheăng kâ, ki ahdrối tâ cho ing kăn ƀô̆, đảng viên. Kăn ƀô̆, đảng viên ôh tá ai xê tối to Đảng ủi, Vi ƀan Măt trâ̆n Tơnêi têa Việt Nam cheăm lơ Vi ƀan hnê ngăn cheăm Tu Mrông pơrá athế veăng pêi pro tơrêm túa cheăng i nhên, ing tơdroăng ki mơdâ hdrê loăng, hnê tối ‘na tơdroăng lăm seá ngăn, tơdroăng hnê mơhnhôk pêi cheăng. Tơdroăng séa ngăn akố cho, rơtế veăng pêi, rơtế seá mơnhên ngăn, ôh tá xê tơkôm pá xôp pêi pro klêi mê nếo lăm mơnhên ngăn”.

Mâu tơdroăng ki hiăng pêi châ tơƀrê ƀă túa cheăng ing pơlê cheăm a Tu Mrông cho ki vâ mơnhông tơdroăng ki tơtro ăm i hiâm mơno tơdroăng pơkâ dêi Hneăng hôp kăn teăng mâ Đảng ƀô̆ kong pơlê Quảng Ngãi roh má I, hneăng hơnăm 2025-2030 mot tung tơdroăng rêh ối. Mâu cheăm pơrá pêi pro adrêng tơdroăng ki mơnhông pêi cheăng kâ hnối mơnhông tơdroăng rêh kâ ối kuăn pơlê, xo kuăn pơlê cho ki xiâm, cho mâu ngế ki kal vâ ai troăng hơlâ hnê mơhnhôk, djâ troăng vâ mơnhông Quảng Ngãi tơtêk rĕng, krá tơniăn tung hneăng ki nếo.

Khu pơkuâ hnê ngăn Đảng kong pơlê Quảng Ngãi hiăng vêh mơnhên  hnoăng cheăng ki pơkâ thế, hnê tối cho hnoăng cheăng ki xiâm, pơkâ pêi pro tơdrêng tơdroăng pơkâ ing kong pơlê troh a pơlê cheăm. Pôa Hồ Văn Niên, Kăn pơkuâ hnê ngăn Đảng ủi kong pơlê Quảng Ngãi hiăng pơkâ thế mâu khu râ, khu kăn hnê ngăn thâ rĕng mơjiâng tơdroăng cheăng, tơdroăng pơkâ pêi pro ki nhên, hnối pôu râng hnoăng cheăng dêi mơngế ki pơkuâ a xiâm.

“Thăm mơdêk tơdroăng ki rak vế, pêi pro tiô tơdroăng tơkêa bro, ai tơdroăng ki tơdjêp, rak vế, pêi pro tiô ivá ki vâ lân rơdâ, thăm mơdêk mơnhông pêi cheăng kâ-rêh ối pơlê pơla. Séa mơnhên, vêh ngăn mâu tơdroăng tơkêa bro ki ối tơvâ tơvfân, ối kreăng vâ tơkŭm lêi tah lôi ki xahpá, ki ối kreăng, thăm mơdêk hnoăng pêi lơ tơleăng mơnhên tro tiô tơdroăng pơkâ, tah lôi ki mơhrê liăn ngân, mơhía lôi kế tơmeăm”.