A roh hôp, Ngế pro xiâm hnê ngăn tơnêi têa pơkâ tung la ngiâ Khu xiâm pơkuâ Kơmăi kơmok kêi đeăng hô sơ, tơbleăng tơdroăng pơtê tơrŭm cheăng ‘na mơ’no liăn cheăng mơjiâng pro hngêi kơmăi trếo tik nik Ninh Thuận 2 ƀă khu tơrŭm hdrối mê ƀă hbrâ tơpui tơno tiô hiâm mơno “pơxúa tơtro, trâm pá gum dêi pó” tiô tro tơdroăng pơkâ dêi Luât Mơ-éa ki tơkêa lâp plâi tơnêi ƀă luât ki tơdjâk.

Pakĭng mê, hbrâ tơrŭm ƀă mâu khu xiâm, kơ koan cheăng tiô tơdroăng hnoăng cheăng, môi tuăn vâ tơpui tơno, tối ƀă mâu khu tơrŭm cheăng mơ’no liăn cheăng mơjiâng hngêi kơmăi on tơhrik trếo tik nik Ninh Thuận 1, teăm tơdrêng tơbleăng râ ai hnoăng mâu tơdroăng ki trâm pá nếo.

Ngế pro xiâm hnê ngăn tơnêi têa pơcháu Khu xiâm pơkuâ liăn ngân tơrŭm ƀă Vi ƀan kong pơlê Khánh Hòa séa ngăn, pơkâ tơ’nôm kơxô̆ liăn ngân tơnêi têa tŏng gum vâ pêi pro tơdroăng tơkêa bro xĕn kuăn pơlê, vêh xĕn kuăn pơlê, tăng tơnêi ăm mâu hngêi kơmăi on tơhrik kơtâu ƀă trếo tik nik Ninh Thuận. Tơdrêng amê, thâ tơrŭm ƀă mâu khu xiâm, kơ koan ki ai tơdjâk, hbrâ tơkŭm po tơpui tơno ‘na tơdroăng pro mơ-éa ăm mung liăn ăm tơdroăng tơkêa bro hngêi kơmăi on tơhrik Ninh Thuận 1, on tơhrik Ninh Thuận 2, tơniăn tơdâng tơ’mô ƀă Tơdroăng pơkâ tơrŭm mơ’no liăn mơjiâng hngêi kơmăi vâ kĭ a khế 3 la ngiâ.