Tơpui hnê mơhno a rôh hôp, pôa Tô Lâm, Kăn xiâm pơkuâ hnê ngăn cheăng Đảng, Kăn xiâm hnê ngăn tơnêi têa tơmâng xo mâu tơdroăng ki hiăng pêi pro tơƀrê dêi Đảng lêng Tơnêi têa, râ Đảng, pơkuâ rêm râ ƀă kăn ƀô̆, lêng tâi tâng khu lêng tung pêi pro hnoăng cheăng tung pơla hdrối nah; hlối pơkâ thế, tung la ngiâ ah khu kăn Đảng, kăn pơkuâ rêm râ pêi pro kơtăng ‘na hiâm mơno tuăn tơmiât hnê mơhno “Rak vế Tơnêi têa sap ing hdrối, sap ing hngế athế pơxiâm sap ing ivá ki rĕng ngăn hlo, tối tơbleăng ing hơngế ƀă pêi pro hdrối”.

Pôa hnê mơhno kơ koan ki ai tơdjâk troh dêi Đảng lêng Tơnêi têa, Khu xiâm pơkuâ ngăn lêng tơkŭm mơdêk ki rơkê tung hriăn ngăn, tối tơbleăng tí tăng ‘nâi tung la ngiâ; hbrâ rơnáu kơnó mâu tơdroăng pêi pro tiah hmâ ƀă gâk kring, tơdroăng ki ôh tá tơniăn tung măng. Pơtối mơdêk ki rơkê tung hnê hriâm, hbrâ rơnáu tơplâ, pơkuâ ngăn krá tơniăn kơpong tơnêi, kơpong têa kơxĭ, tơnêi têa, tung măng; khŏm mơ-eăm rak vế krá tơniăn ki tơniăn krê, hnoăng pơkuâ, môi tuăn, tâi tâng tơnêi tơníu ƀă ki pơxúa tơnêi têa hdrông mơngế.