Kơxop hlá mơéa Pơkâ kố ai tŭm mâu tơdroăng ki ‘no hrê xêh liăn ngân tung mâu tíu hnê hriâm, ôh tá tơkôm tung kơlo tŏng gum ‘na liăn ngân, tung mê: ‘no xêh liăn hok thuât, tơdroăng cheăng, séa ngăn ‘na tơdroăng hriăn plĕng khoa hok; séa ngăn xêh ‘na mâu tơdroăng pơkâ tơkŭm po, mâu ngế cheăng; pêi pro xêh ‘na tơrŭm cheăng ƀă kong têa ê; ‘no hrê xêh ‘na liăn ngân, kế tơmeăm, ‘no liăn cheăng.

Mơgêi rôh hôp, pôa Lê Tiến Châu, Phŏ Ngế pro xiâm hnê ngăn tơnêi têa pơkâ thế Khu xiâm ngăn hnê hriâm ƀă hnê mơjiâng tuăn ngoâ rơkê tơrŭm ƀă mâu khu xiâm ki ai tơdjâk chêh pro klêi kơxop hlá mơéa Pơkâ vâ teăm pâ rơkong tơpui tối dêi mâu ngế tung Chin phuh hdrối hâi lơ 20/7.

Tơdrêng amê hlối tơrŭm ƀă Khu xiâm ngăn Kŏng an, Khu xiâm tơpui kâ séa ngăn mâu tơdroăng ki kal dêi kơxop hlá mơéa pơkâ, malối cho mâu tơdroăng ki ai tơdjâk troh ‘no hrê xêh liăn ngân, hâi khế hok thuât tiô troăng ki tơniăn krê ‘na hok thuât ƀă mâu kơvâ cheăng khoa hok kih thuât, kong ngê̆, tự nhiên; klâ xoăng nhên troăng hơlâ ‘no hrê xêh tơmeăm xúa pơla tíu hnê hriâm đăi hok kong lâ̆p ƀă tư thục.