Mơgêi a Rôh hôp, pôa Phạm Minh Chính, Ngế pro xiâm hnê ngăn Chin phuh tối rơdêi, kơpong Tơbăng kroăng Cửu Long ƀă kơpong ki achê cho kong pơlê ai tíu ối tung la ngiâ malối kal khât ‘na cheăng kal kí, cheăng kâ-rêh ối pơlê pơla, cheăng lêng, gâk kring, kong prâi tơnêi tơníu, tơpui kâ; cho “bo cheăñg vâ krếo thế” peăng Hdroh dêi tơnêi têa tro ƀă tơdroăng cheăng mơjiâng, rak vế hnoăng pơkuâ tơnêi tơníu dêi Tơnêi têa.

Ngế pro xiâm hnê ngăn Chin phuh tối nhên, mâu khu xiâm, kơvâ cheăng, kong pơlê athế tơkŭm tơbleăng pêi pro troăng hơlâ tŏng gum hdroâng kuăn ngo, tơdroăng tiô khôp; pêi pro mâu tơdroăng mơnhông cheăng kâ, túa lĕm tro, rêh ối pơlê pơla, tăng cheăng pêi, tơleăng mâu tơdroăng ki ôh tá môi tuăn, hêng hôu; mơdêk hiâm mơno mơ-eăm dêi hdroâng kuăn ngo tung mơnhông cheăng kâ rê ối pơlâ pơla ƀă rak vế, mơnhông mâu kế tơmeăm ki kơnía dêi túa lĕm tro, tơdroăng loi tĭng tiô khôp khôi hmâ; mơdêk tơdroăng rêh ối hiâm mơno dêi kuăn pơlê mâu hdroâng kuăn ngo a kong pơlê, pro ivá krá rơdêi tung tơdroăng cheăng hbrâ mơdât tung pơlê pơla; tah lôi mâu tơdroăng ki ôh tá tro, tơdroăng ki mâu khu ‘mêi pơlông tơtrâ vâ pro pơxúa ăm dêi tơná.

Ki hdrối tâ, tung hơnăm 2026, Ngế pro xiâm hnê ngăn Chin phuh pơcháu ăm mâu khu xiâm, kơvâ cheăng, kong pơlê pro klêi 7 khu tơdroăng cheăng ki kân, ki kal ‘na tŏng gum mơnhông cheăng kâ, túa lĕm tro, hnê hriâm, khăm pơlât ăm kơpong Tơbăng kroăng Cửu Long.