3 ngế ki nếo châ rup mê cho: Y Khing Liêng (kot mâ 1992, a cheăm Hòa Sơn, tơring Krông Bông); Y Huăl Êban (kot mâ 1970, a  ƀuôn Mấp, pơlê kân Ea Pốč, tơring Čư Mgar) ƀă Nay Dương (kot mâ 1968, ối a cheăm Čư Pơng, tơring  Krông Búk).  

Kố cho 3 ngế ai inâi tro kong an kong pơlê Dak Lak tơleăng pơkâ khŏm châ tăng rup ki tơviah ‘na tơdroăng ai xôi “mot plâ vâ tơtrâ mâu kăn kuăn pơlê” tiô tơdroăng 113 dêi khu Luât tơleăng phak mơngế ai xôi. Mâu ki mê hiăng veăng mot plâ a Tíu pêi cheăng Vi ƀan 2 to cheăm Ea Tiêu ƀă Ea Ktur, tơring Čư Kuin hâi lơ 11/6 kố nah klêi mê kơtâu hdâ. 

Kơxo hâi lơ 21/7, tâng tối 3 ngế ki mê dế hmuâ a kơpong chiâk ki rơhĭng  rơhối dêi ƀuôn K’niêt, cheăm Ea Ktur, tơring Čư Kuin, mâu kong an Dak Lak hiăng troh gâk rơtâ tá ƀă rup. Nôkố mâu khu râ hiăng kơ-êng tơmâng xo tơdroăng ki vâi tối. Tiah mê troh nôkố, khu râ pơkuâ cheăng kong pơlê Dak Lak hiăng rup châ tâi tâng 6 ngế ki ai inâi thế khŏm châ tăng rup ki tơviah tung tơdroăng mot plâ a tơring Čư Kuin hâi lơ 11/6 bro 9 ngế hlâ ƀă 2 ngế tro rong.

Troh nôkố, kơ koan kŏng an hiăng tơleăng phak 84 ngế ai xôi, tung mê 75 ngế ai xôi ‘na khu ‘mêi  vâ tơtrâ mâu kăn kuăn pơlê; 7 ngế ai xôi ‘nâi  la kơtôa ôh tá vâ tối ăm mâu kăn ‘nâi ‘na ngế ki ‘mêi, 1 ngế ai xôi kơtôa mơngế ai xôi; 1 ngế ai xôi ‘na Tơkŭm djâ, tăng lông mâu ngế ki ê kơtâu ngi kong têa vâi, mot tung tơnêi têa lơ ối hlối a Việt Nam hmâng to lo vâ.