Ối tung troăng ôm hyô têa kơxĭ Phan Thiết - Mũi Né - Bàu Trắng - Cổ Thạch, thôt Pô Sah Inư a ngo Bà Nài (bêng Phú Thủy, kong pơlê Lâm Đồng - ối tung kong pơlê Bình Thuận hdrối nah) dế tơ’mot hên kơdrâm kuăn pơlê ôm hyô troh ôm hyô a rơnó pơtê hriâm. Vâ mơdêk tơdroăng ki châ lăm ngăn, Khu rak ngăn tíu xối tơbâ tơrŭm ƀă Đô̆i hơdruê xuăng tiô tơdrá chal krâ Chăm mơđah, hơdruê xuăng tiô khôi hmâ ăm tơmối ki troh ngăn.

Tơdroăng tơrŭm pơla tơnêi tơníu ki phuâng lĕm, túa ki kơchuâ chêh lĕm tro ƀă tơdrá hơdruê xuăng chal krâ hiăng pro ivá tơ'mot kuăn pơlê lăm ngăn. Krê tung 6 khế apoăng hơnăm 2025, kơpong Bình Thuận hdrối nah tơdah lối 1 rơtuh ngế tơmối. Tâi tâng 6 khế apoăng hơnăm 2025, kơpong kố hiăng tơdah lối 5,5 rơtuh ngế, tâk vâ chê 20% tâng vâ pơchông ƀă khế kố hơnăm nah; kơxô̆ liăn châ xo ing ôm hyô lối 15 rơpâu rơtal.