Ing Hneăng hôp 13 troh nôkố, tung pơla pá puât tơdjuôm dêi tơdroăng cheăng kâ lâp plâi tơnêi, ‘’Tơkâ hluâ khía pêi ki tơrôu’’, cheăng kâ Việt Nam xuân tơtêk hên ƀă rak châ tơdroăng tơtêk tơniăn klêi kơ’nâi pơreăng kân COVID 19. Hơnăm 2023, tâi tâng kơxô̆ tê ngi kong têa ê châ vâ chê 700 rơtal dollars Mih; mơhnhôk mơ’no liăn cheăng tơnêi têa châ 23 rơtal dollars Mih, cho kơlo ki hên má môi sap ing nah troh nôkố; tơdrêng amê, chiâng môi tíu eăng ‘na tơdroăng tơniăn, gum rak tơniăn ƀă mơnhông cheăng kâ tung pơla tung tơnêi têa ƀă lâp plâi tơnêi trâm hên pá puât, ôh tá tơniăn.

Hơnăm 2024, troăng pêi GDP hiăng châ lối 476,3 rơtal dollars (tâk vâ chê 60 xôh tâng pơchông ƀă hơnăm apoăng pơhlêh nếo) chiâng tơdroăng cheăng kâ kân má pŭn dêi ASEAN ƀă má 32 dêi lâp plâi tơnêi. Xông tơpui a Hneăng hôp Khu tê mơdró hơnăm ối nếo Việt Nam roh má VIII nếo achê kố, pôa Phạm Minh Chính, Ngế pro xiâm hnê ngăn Chin phuh tối nhên:

‘’Klêi kơ’nâi vâ chê 40 hơnăm pơhlêh nếo cheăng kâ Việt Nam hiăng tơtêk hôm châ tơƀrê. Tâng tâi hơnăm 2025 tơtêk châ lối 8%, tâi tâng tơdroăng cheăng kâ 510 rơtal dollars, ối má 32 lâp plâi tơnêi. Tơdâng ko mơngế châ lối 5.000 dollars. Tiah mê, tơnêi têa pin mot tung tơnêi têa pêi lo liăn tơdâng hên (tơdâng hên dâng 4.700 ki Việt Nam lối 5.000). Kố cho môi tơdroăng châ tơƀrê tơdjuôm dêi Đảng ƀă Tơnêi têa pin’’.

Kô chiâng hlo, 40 hơnăm pêi pro troăng prôk Pơhlêh nếo hiăng mơjiâng chiâng tơdroăng ki pơhlêh, djâ tơnêi têa tơkâ hluâ tơdroăng ôh tá tơniăn, hrá mơnhông mơdêk vâ xông mơ-eăm rơdêi ƀă ivá nếo. Tơdroăng cheăng kâ kơchơ mơdró tiô troăng xah hô̆i chuh ngiah rế thăm kêi đeăng, troăng pêi ƀă ivá tơbriêt rơdêi châ mơdêk inhên; thăm rak a kơlo ki hên tung hên hneăng, tơdroăng rêh ối kuăn pơlê đi đo châ pơhlêh. Khu cheăng kal kí châ pro krá, troăng pơkuâ dêi Đảng pơtối pơhlêh nếo, xêt khât, châ tơƀrê pơkuâ tơnêi têa rế hía rế tâk. Tơpui kâ ƀă kong têa ê ƀă mot tơrŭm lâp plâi tơnêi châ mâu tơdroăng châ tơƀrê, mơdêk tíu pêi cheăng ƀă ki loi tơngah dêi Việt Nam tung lâp plâi tơnêi.

Mâu tơdroăng châ tơƀrê ai kơnâ kố cho tơdroăng apoăng chiâng xiâm kối krá tơniăn vâ tơnêi têa xông tơtêk, tơdrêng amê pro krá tơdroăng loi tơngah dêi kuăn pơlê tung tơdroăng pơkuâ dêi Đảng, pơtroh tơdroăng ki ai khât nôkố kal khât vâ Đảng pin mơjiâng Hlá Mơ-éa ki kal Hneăng hôp má XIV tiô troăng pơhlêh nếo, pói vâ ƀă troăng tơmiât la ngiâ mơnhông mơdêk nếo. Tiô pôa Tô Lâm, Kăn xiâm pơkuâ hnê ngăn Đảng, Hneăng hôp Đảng lâp tơnêi têa roh má XIV ai kơnâ kal khât djâ tơdroăng ki châ tơƀrê, cho tơdroăng ki hdró ki má môi a troăng mơnhông mơdêk dêi tơnêi têa pin, po troăng ‘’chal xông mơ-eăm xêh mơnhông kro mơdrŏng ƀă xông tơtêk rơdêi’’.

Vâ pêi pro mâu troăng pêi cheăng ton xŏn dêi Đảng, mơ-éa chêh hdrối mâu mơ-éa ki kal tơbleăng Hneăng hôp má XIV hiăng cha hbrâ inhên, mơnhên troăng prôk ton xŏn, tơdjêp tuăn ngôa rơkê dêi Đảng ƀă kuăn pơlê, mơhno tơdroăng môi tuăn ‘’Tiô ki Đảng vâ’’ ƀă ‘’Tiô hiâm mơno kuăn pơlê’’; tơkŭm tŭm mâu tơdroăng vâ tơnêi têa mot tung hneăng mơnhông nếo. Phŏ Yăo sư - Tiê̆n sih Nguyễn Trọng Phúc, Hok viê̆n Chĭn trĭ Kuô̆k ya Hồ Chí Minh tối:

‘’Hneăng hôp má XIV cho troăng mơnhông hên dêi Đảng, cho tơdroăng ki hdró ai mơnhên tơdroăng ki xông kân dêi Đảng, Tơnêi têa... laga tơkŭm po pêi pro, pro chiâng ai khât tơdroăng pơkâ dêi Hneăng hôp, pêi pro troăng hơlâ kân, mâu tơdroăng hnê mơhno ton xŏn dêi Hneăng hôp, pơkâ kân dêi chal nếo... Hnê mơhno vâ pêi pro môi tiah lâi nếo kal má môi. Rêm tơdroăng mơnhông dêi tơnêi têa klêi kơ’nâi Hneăng hôp má XIV mê tiô a tơdroăng pơkuâ, hnê mơhno dêi Tơnêi têa, Khu xiâm kal kí, khu râ kăn cheăng kal kí tung rơxông nếo’’.

Ƀă dó inâi ‘’Pá kơdâm hlá cơ ƀlêi trâng dêi Đảng, tơdjuôm ivá, môi hiâm mơno pêi pro ƀlêi trâng mâu pơkâ mơnhông tơnêi têa troh hơnăm 2030; pơkuâ xêh troăng pêi cheăng ton xŏn, xông mơ-eăm xêh, loi tơngah, prôk rơdêi tung chal xông mơ-eăm xêh dêi hdroâng mơngế, xua hơniâp lĕm, tơniăn krê, kuăn pơlê pơkuâ dêi hnoăng cheăng, kro mơdrŏng rơdêi, xông tơtêk, rơkê, hơniâp lĕm, kơteăng krá to a chuh ngiah pơlê pơla’’, Hneăng hôp Đảng lâp tơnêi têa roh má XIV cho tơdroăng ki pơtó ƀă mơnhông mâu tơdroăng châ tơƀrê hiăng châ dêi 40 hơnăm pơhlêh nếo; cho tơdroăng hdró ki kal tung troăng prôk la ngiâ môi tơnêi têa mơnhông mơdêk, kro mơdrŏng ƀă rơdêi ‘nâng.