Tiô tối tơbleăng, hơnăm 2025, Dak Lak ai 4 tơdroăng pơkâ cheăng kâ luâ tơdroăng pơcháu, tung mê tâi tâng pê lo tơmeăm tê ăm kong têa ê tâk lối 26% tâng vâ pơchông ƀă hơnăm 2024; tâi tâng liăn ngân lo châ 18.208 rơtal liăn, tâk 28,56%; pê lo liăn tâng riên rêm ngế châ 80,6 rơtuh liăn. Tơdroăng rêh ối châ tơniăn ƀă pê klêi 100% pơkâ mơjiâng pro 2.800 toăng hngêi ối pơlê pơla ƀă tah hngêi pơtân hngêi xi kơchoh.

Mot tung hơnăm 2026 - hơnăm apoăng tơdroăng pơkâ mơnhông 2026 -2030, Dak Lak pơkâ pêi tâk péa kơxô̆; kơxô̆ rơpŏng kơtiê tơdjuôm tung lâp kong pơlê châ sap 3%, krê kơpong kuăn ngo kơdroh ing 4% tơngi klêng; mơdêk rĕng hơ’lêh pêi cheăng tiô troăng hơlâ mơdró kâ - cheăng ƀă kơmăi kơmok pro tơmeăm khoăng.

Tối mơgêi a rôh hôp, pôa Tạ Anh Tuấn, Kăn xiâm hnê ngăn Vi ƀan Kuăn pơlê kong pơlê Dak Lak tối nhên, tâi tâng mâu ki cheăng kal kí mâu kăn thế hơ’lêh tuăn tơmiât, pêi pro kơtăng ƀă chiu pôu râng hnoăng cheăng tơná troh tui lui tơdroăng cheăng hiăng pơkâ, pakĭng mê, mơdêk xo liăn ngân ‘no pro tơmeăm khoăng tơnêi têa, rơtế ƀă hnoăng cheăng pêi nhên ƀă tơrêm ngế pơkuâ mơjiâng pro, tơrêm cheăm bêng ƀă thế mơnhên pơxâu kơtăng ƀă khu ki lâi pro hrá tơdroăng tơkêa pro.