Pôa Nguyễn Chí Dũng, Ngế xiâm pơkâ ƀă ‘no liăn cheăng, kăn pơkuâ Việt Nam nếo veăng hôp a Rôh hôp Kal kí khu râ kăn xiâm ‘na mơnhông krá tơniăn dêi Khu lâp kong têa (HLPF) pơchuât mâu tơdroăng ki vâ mơdêk krá tơniăn ton hơnăm 2023 dêi Việt Nam ƀă pêi cheăng ƀă mâu kơ koan Chin phuh, khu tơrŭm, khu mơdró kâ, khu râng liăn ‘no cheăng, grup pơkuâ ki kân dêi Mih vâ thăm mơdêk tơrŭm cheăng hơ’lêh nếo rơkê ƀă kơmăi kơmok; hriăn ngăn, tối ăm dêi rơpó mâu tơdroăng ki rơkê ƀă tơ’mot ‘no liăn mơjiâng tíu xiâm liăn ngân kong têa ê; pơkâ mơdêk ƀă tơ’mot ‘no liăn cheăng bro mâu tơdroăng xúa kơmăi kơmok rơxông nếo.

Tối tơbleăng dêi Việt Nam a Rôh hôp hiăng tối rơdêi tơhrâ dêi Việt Nam pơtối mơdêk hnoăng cheăng cho tơnêi têa ki tơrŭm cheăng ai hnoăng cheăng pôu râng, veăng kum tơƀrê tung ivá mơ-eăm tơdjuôm dêi mâu kong têa lâp plâi tơnêi. Ki xiâm dêi tối tơbleăng rôh má péa vâ tối ‘na tơdroăng ki pêi pro mâu tơdroăng pơkâ mơnhông krá tơniăn; mâu tơdroăng ki hơ’lêh ƀă tơdroăng ki tơƀrê kal tâng pơchông ƀă rôh má môi; mâu tơdroăng xơpá, pơloăng pơkâ mơ'no ƀă troăng pơkâ tơmiât ki kal vâ mơdêk pêi pro mâu tơdroăng pơkâ mơnhông mơdêk krá ton tung la ngiâ.