VOV4.Xơ Đăng - Kơxo lơ 7/5, a Plông tơ’noăng ƀalong kong pơlê Điện Biên tơkŭm po Leh tơbâ, ăm lêng prôk pơtăng, tơkŭm prôk pơtăng 70 hơnăm Ƀlêi trâng Điện Biên Phủ cho ó rơdêi krip krih.

VOV4.Xơ Đăng - O Nguyễn Đỗ Quang Minh, hok tro lâm 9 a pơlê kân Cẩm Lệ, Đà Nẵng hiăng châ pri má môi roh tơ’noăng chêh kơthô lâp plâi tơnêi UPU roh má 53 hơnăm 2024.

VOV4.Xơ Đăng - Kơxo  hâi lơ 7/5, po Leh mitting râ Tơnêi têa ƀă prôk pơtăng tơbâ 70 hơnăm Plâ ƀlêi trâng Điện Biên Phủ po a pơlê kong kơdrâm Điện Biên Phủ, kong pơlê Điện Biên. 

VOV4.Xơ Đăng - Kong măng lơ 6/5, a pơlê kong kơdrâm Điện Biên Phủ, kong pơlê Điện Biên hiăng po tơdroăng ngê̆ thuât ki tơviah ai inâi “Điện Biên Phủ - Rôh hdró ki kơnía tung tơdroăng ton  nah”.

VOV4.Xơ Đăng - Hâi lơ 6/5, Đăi tươ̆ng Tô Lâm, Ngế xiâm Kŏng an rơtế ƀă khu kăn Kuô̆k hô̆i kong pơlê Hưng Yên hiăng trâm mâ kuăn pơlê hdrối rôh hôp má 7, Kuô̆k hô̆i hneăng 15.

VOV4.Xơ Đăng - Kơxo lơ 6/5, a hneăng hôp má 18 (chuyên đê), Hô̆i đong kong pơlê Gia Lai hiăng tơkŭm po rah xo tơ’nôm ƀă ăm môi iâ mâu ngế pơtê cheăng ối tung tơdroăng pơkâ tiô luât.

VOV4.Xơ Đăng - Kơxo lơ 6/5, a Tíu pêi cheăng Chin phuh, pôa Phạm Minh Chính, Ngế pro xiâm hnê ngăn tơnêi têa tơdah pôa Sebastien Lecornu - Ngế xiâm pơkuâ lêng kong têa Pơhlăng dế ai roh lăm pôu pêi cheăng Việt Nam, veăng mâu tơdroăng leh tơbâ 70 hơnăm Ƀlêi trâng Điện Biên Phủ.

VOV4.Xơ Đăng - Drêng koh tơbâ 70 hơnăm ƀlêi trâng Điện Biên Phủ (7/5/1954 - 7/5/2024), kơxo lơ 6/5, a Hà Nội, khu kăn pơkuâ, mâu kăn pơkuâ hneăng hdrối pơkuâ Đảng, Tơnêi têa troh pleăng rơvĭng reăng ƀă mot tung tíu ‘măn poăng Pôa Hồ Chí Minh; pleăng rơvĭng reăng tơbâ mâu Ngoh khên tơnôu a troăng Bắc Sơn (Ba Đình, Hà Nội).

VOV4.Xơ Đăng - Thăm pơtroh đảng viên mô đô̆i gâk tơkăng kong lăm pro kăn phŏ pơkuâ hnê ngăn cheăng Đảng cheăm, djâ đảng viên mô đô̆i gâk tơkăng kong veăng pêi cheăng rơtế ƀă chi ƀô̆ mâu kơtâu, pơlê a kơpong tơkăng kong Dak Nông dế mơjiâng châ tơƀrê kal khât. Châ hnê mơjiâng tơtro, ai chiâng rơkê ƀă ‘nâi tung tơdroăng pơtâng tối mơhnhôk ƀeăn ƀĕng rơkê, đảng viên krâ kơlŏng ngiât dế kum pơhlêh ‘’troăng tơmiât pêi’’, kum tơdroăng rêh ối dêi kuăn pơlê mâu hdroâng kuăn ngo a kơpong tơkăng kong, kơpong hơngế hơngo dêi kong pơlê Dak Nông rế hía rế tơniăn ƀă mơnhông.

VOV4.Xơ Đăng - Tung hneăng tơplâ xâ a Điện Biên Phủ, xua pá puât ‘na tơdroăng pơtroh răng pháu, Khu kăn pơkuâ ngăn hneăng tơplâ mê hiăng mơhnhôk: “Tơbriât paraxut vâ xo răng kơnŏng, ‘mrâm pháu”, “Xo pháu hơnêa dêi xâ plâ tơná xâ”. Tơdroăng cheăng kố hiăng chiâng môi tung mâu tơdroăng pêi pro dêi mô đô̆i pin tung tơplâ, kơnôm tiah mê, hiăng pá ai tơdroăng ki khuô̆t, ti ai ‘mrâm hơnêa, răng kơnŏng ƀă hiăng veăng kum kal kân khât khoh pro châ ƀlêi trâng Điện Biên Phủ 70 hơnăm hdrối nah.