Tơdroăng ki kum phái ăm rơpŏng ki veăng pêt kong ƀă thăm mơnhông pêt loăng a kong pơlê Kon Tum nôkố xuân tá hâi tá châ pêi pro. Kố cho tơdroăng ki châ mâu kăn Hô̆i đong hnê ngăn kong pơlê Kon Tum Hneăng má XII vâ ‘nâi plĕng khât, êng a Hneăng hôp rôh má 7 dế po a pơlê kong kơdrâm Kon Tum. Pôa Ka Ba Thành, kăn pơkuâ ngăn cheăng Đảng tơring Tu Mrông mơhno tơdroăng ki hêng hôu khât, xua troăng hơlâ kố ối tung tơdroăng tơkêa 3 Tơdroăng pơkâ dêi tơnêi têa mơnhông cheăng kâ rêh ối pơlê pơla kơpong hdroâng kuăn ngo ƀă peăng kong ngo, nôkố kong pơlê xuân tá hâi pêi pro.

“Tơdroăng tŏng kố pơla hơnăm 2021 – 2025 nôkố hiăng vâ tâi hơnăm 2024 mê drêng lâi ah nếo châ tŏng kum? Á pâ thế tơmâng ngăn hnê mơhno tơdroăng kố vâ kuăn pơlê hdroâng kuăn ngo ƀă rơpŏng Xuăn ki pá ai rôh châ xúa troăng tŏng kum kố ƀă troăng tŏng kố chiâng vâ pêi pro”.

Hơnăm 2024 ƀăng tơnêi ki châ pêt kong dêi kong pơlê Kon Tum tiô pơkâ cho lối 2.100 ha ƀă tơdroăng rơhêng vâ châ tŏng kum phái ăm rơpŏng ki veăng rak vế, pêt kong cho lối 1 rơpâu tâ̆n phái. Tiô pôa Nguyễn Hữu Tháp, kăn phŏ hnê ngăn Vi ƀan kong pơlê Kon Tum, tơdroăng tá hâi pêi pro cho ối tơvâ tơdjâk troh pơkâ a Troăng 22, Tơdroăng pơkâ kơxô̆ 12 hâi 20/9/2022 dêi Khu xiâm ngăn chiâk deăng ƀă Mơnhông thôn pơlê:

“Tơdroăng ki tơvâ akố nôkố tá hâi ai pơkâ nhên vâ mơnhên kơlo tŏng kum phái tiô ƀăng tơnêi, kơxô̆ pơ’leăng mâ mơngế ăm tơtro ƀă ki khât a kong pơlê. Tá hâi ai pơkâ ‘na kơ koan séa ngăn kĭ pơkâ tơdroăng tơkêa hbru phái rak vế ƀă mơnhông pêt kong. Tá hâi ai pơkâ dêi khu ki ai hnoăng pơkuâ tơbleăng yă phái a kong pơlê, râ kong pơlê, râ tơring ƀă kơ koan tơbleăng”.

Tơdjâk troh mâu tơdroăng tơvâ ki nếo tối a kơpêng, châ ‘nâi kong pơlê Kon Tum hiăng ai hên hlá mơ-éa tối tơbleăng ăm mâu Khu xiâm, kơvâ cheăng Tơnêi têa pơkâ thế hnê mơhno vâ tŏng gum tơdroăng pá kố. Laga troh nôkố mâu Khu xiâm kơvâ cheăng Tơnêi têa xuân tá hâi ai troăng hnê mơhno nhên mê kong pơlê tá hâi pêi pro troăng hơlâ tŏng gum phái ăm rơpŏng ki pêt kong ƀă thăm mơnhông pêt loăng. Hên rơkong tơpui tối dêi mâu kăn Hô̆i đong hnê ngăn kong pơlê Kon Tum tối tiah kố, tơdroăng ki troăng hơlâ tŏng kum ai la hrá pêi dế tơdjâk troh pơkâ mơnhông cheăng kâ rêh ối pơlê pơla xuân môi tiah tơdroăng ki hơ’lêh túa rêh ối dêi kuăn pơlê.

Xuân a Hneăng kố dêi Hô̆i đong hnê ngăn kong pơlê Kon Tum, tơdroăng ki rơpŏng kuăn pơlê hdroâng kuăn ngo ôh tá ai ối, tơnêi pêi dế cho tơdroăng ki xiâm a rôh hôp tơpui. Hên rơkong tơpui dêi mâu kăn tối tiah kố, ai tơdroăng ôh tá tơdâng kân pơla tối tơbleăng ƀă tơdroăng ki ai khât tung rêh ối dêi kuăn pơlê. Tiô tối tơbleăng dêi Vi ƀan hnê ngăn kong pơlê Kon Tum, tiô tối hdrối tung 6 khế apoăng hơnăm 2024, kơxô̆ rơpŏng hdroâng kuăn ngo dêi kong pơlê ai tơnêi ối ƀă tơnêi pêt tơmeăm pơrá châ 99,3%. La jâ Phan Thị Thủy, Ngế pơkuâ Túa lĕm tro – pơlê pơla mơhno tơdroăng ki ôh tá ‘nâi plĕng pơla kơxô̆ ăm hlo ƀă ki ai khât tơdroăng rêh ối dêi kuăn pơlê:

“Ki khât dế trâm, môi toăng hngêi ai 2, 3 rơpŏng ối tung mê. Bu to kâ tê, ‘nân ối xah hêi tơno xo xua ôh tá ai pêi chiâk deăng. Tối gá tiah mê khât. Athế tơmiât nhên môi tiah lâ vâ tŏng kum iâ tơdroăng kố tâng ối lôi tiah mê pin hmôu pơ tiô kơxô̆ pơkâ mê gá pá khât”.

Kăn Hô̆i đong hnê ngăn kong pơlê Kon Tum tối tiah kố, tơdroăng ki tŏng kum pơkâ ôh tá ai tơnêi ối, tơnêi pêi kâ ăm rơpŏng hdroâng kuăn ngo ôh ti xê to kum mâu rơpŏng tơnăn tung rêh ối mê ối mơdêk tơ’nôm tơdroăng loi tung tơdroăng pơkuâ dêi Đảng, Tơnêi têa; veăng kum thăm mơdêk, ‘mâi mơnhông tơrŭm hdroâng kuăn ngo, rak vế rơdêi gâk kring tơdroăng kal kí, tơniăn tung lâp pơlê pơla kơpong hdroâng kuăn ngo, kơpong tơkăng kong dêi Tơnêi têa.

Xua mê, tơdroăng ki pêi pro troăng tŏng kum kố kal rak vế krâu, tro ôh tá ai tuăn mơno loi tung tơdroăng mơhno kơxô̆ tá kong pơlê bu ối vâ chê 1% kơxô̆ rơpŏng hdroâng kuăn ngo ôh tá ai tơnêi ối, tơnêi pêi kâ:

“Á ôh tá loi tung kơxô̆ ki tối kố. Túa tơmiât dêi á hlo tá hâ tro khât, hlo ối tá hâi nhên khât. Ki khât pin hlo kơpong kuăn pơlê hdroâng kuăn ngo lăm a tíu lâi xuân ôh tá ai tơnêi ối. Mê nếo tơnêi pêi kâ xuân ối kal nhên khât. Tung pơlê Nông Nội, pơlê ai tơdroăng rêh ối cheăng kâ chía niân má môi dêi cheăm Dak Nông mê xuân ối ai hên rơpŏng ôh tá ai tơnêi ố, tơnêi pêi kâ. Pin pro tiah lâi pin pêi pro hlo tơdroăng ki ai khât mê”.

Hlá mơ-eá tơbleăng ing kơvâ cheăng ki ai tơdjâk troh kong pơlê Kon Tum ăm hlo, lối 20 hơnăm hdrối pêi pro troăng hơlâ tŏng kum dêi Đảng, Tơnêi têa, kong pơlê hiăng tŏng kum tơnêi ối ƀă tơnêi pêi kâ ăm lối 16.100 rơpŏng kuăn pơlê  hdroâng kuăn ngo. Nôkố, tung lâp kong pơlê ối vâ chê 3.900 rơpŏng hdroâng kuăn ngo ôh tá ai tơnêi ối, tơnêi pêi kâ.