Khế 2/2023, Mố đô̆i gâk tơkăng kong kong pơlê Cao Bằng hiăng plâ ‘nhiê tah lôi tơdroăng CB223p ‘na roê tê mơngế, ngế ki tro vâi roê tê mê cho muăn tá hâi châ môi khế. Khu ki ai tơdjâk troh hiăng rup kroăng Lê Thị Mỹ Lệ ƀă Phạm Thành Sinh (rơtế ối a tơring Krông Pač, kong pơlê Dak Lak). Prế ki kố châ vâi hlo drêng prế djâ muăn tơkâ luâ tíu tơkăng kong (ối tung kơtâu Tềnh Quốc, cheăm Cần Nông, tơring Hà Quảng). Khế 7/2023. Kŏng an kong pơlê Cao Bằng pơtối plâ ‘nhiê tơƀrê tơdroăng 623M, tŏng xo 2 ngế droh cho ngế ki vâi rup ‘na roê tê mơngế ing Myanmar vêh Việt Nam.

Tối ‘na tơdroăng ki roê tê mơngế hiăng trâm a cheăm, nâ Hứa Thị Thạch, Kăn hnê ngăn vâi kơdrâi cheăm Cần Nông, pơlê kân Thông Nông, tơring Hà Quảng, kong pơlê Cao Bằng ăm ‘nâi:

“Cheăm Cần Nông cho cheăm tơkăng kong. ‘Na tơdroăng ki roê tê mơngế tơkâ luâ tíu tơkăng kong mê xuân hmâ trâm a cheăm, malối cho tung mâu hơnăm pơla hdrối kố nah xuân hiăng ai 1 troh 2 ngế a cheăm. Môi rôh ki nếo má môi cho a khế 2 hơnăm 2023 cho môi ngế o kŭn kơnốu 16 hâi tro khu ki roê tê mơngế ai tuăn tơmiât vâ djâ o mê ngi kong têa Sinuâ la hiăng tro khu ki ai tơdjâk troh châ ‘nâi a tơneăn tâp hdró 614 cheăm Cần Nông. Klêi kơ’nâi mâu kơvâ cheăng ki ai tơdjâk troh châ hlo ƀă rup kroăng mê tơná á cho kăn hnê ngăn vâi kơdrâi cheăm klêi kơ’nâi ‘nâi tơdroăng xuân hiăng lăm troh rak ngăn muăn mê a đông mố đô̆i gâk tơkăng kong ƀă mơhnhôk mâu rơpŏng ai kuăn tơxĭn tŏng gum ăm tah ƀă gum ăm têa tôu ro mê nếo veăng tơlo liăn mơhnhôk hriâm dêi tơring xuân diâp châ 2 rơtuh liăn vâ roê têa tôu ro ăm muăn, klêi mê á djâ muăn mê pơcháu ăm Tíu xiâm rak vế tŏng gum pơlê pơla kong pơlê vâ pơtối rak ngăn ƀă păn rak muăn”.

Vâ hbrâ mơdât mâu ngế ki pro xôi rơ-iêo kố, pakĭng tơdroăng ki veăng gum kơtăng dêi khu lêng ki ai tơdjâk troh môi tiah Kŏng an, Khu ngăn mố đô̆i gâk tơkăng kong, tung pêi pro mâu tơdroăng Tơkêa kơxô̆ 8, “Pêi pro tơdâng tơ’mô pơla kơnốu ƀă kơdrâi ƀă pơkâ tơleăng mâu tơdroăng ki kal ƀă vâi kơdrâi ƀă vâi hdrêng”, Khu ngăn vâi kơdrâi kong pơlê Cao Bằng hiăng ai hên túa hnê tối rơkê plĕng ƀă tơƀrê. Nâ Hứa Thị Thạch, Kăn hnê ngăn vâi kơdrâi cheăm Cần Nông ăm ‘nâi tơ’nôm:

“Tung tơdroăng ki hlê plĕng dêi vâi krâ nhŏng o tíu kố, mê tơdroăng ki roê tê kuăn ‘nĕng vâ ngi kong têa peăng pá tá tơkăng kong vâ pêi cheăng vâi, vâ xo kơnốu kong têa ê ƀă hên ki ê mê gá xuân cho tơdroăng ki rơ-iêo ƀă xuân dế ối hmâ trâm. Ngin hnê tối a cheăm pơlê mê hmâ hnê tối troh vâi krâ nhŏng o kuăn pơlê, troh mâu ngế ki tê mơngế mê ngin athế tơpui tối leăng ‘na mâu tơdroăng ki xôi drêng pêi pro roê tê mơngế ƀă xuân mơdêk ki hlê plĕng tơ’nôm cho túa ki pôu râng dêi pơlê pơla tung tơdroăng pơsăm tối mâu ngế ki pro xôi drêng pin cho kuăn pơlê a tíu tơkăng kong mê pin hlo mâu ngế ki tơviah hlo mâu ngế môi tiah mê athế tơbleăng tơdrêng hlối ăm khu kăn pơkuâ lơ khu ki ai tơdjâk troh vâ pơxâu phâk teăm tơdrêng”.

Tiô nâ Hoàng Trang Định, Kăn hnê ngăn vâi kơdrâi pơlê kân Thông Nông, tơring Hà Quảng, ƀă hnoăng cheăng cho ngế ki hnê tối, mơhnhôk ƀă tŏng gum vâi kơdrâi, vâi hdrêng tro roê tê vêh dêi ƀă pơlê pơla, rêm ngế hô̆i viên cho môi ngế ki hnê tối a cheăm pơlê. Tơdroăng kố, kô gum ngế ki pêi hnoăng cheăng hnê tối mơhnhôk a cheăm pơlê po rơdâ hnê tối troh khu ngăn vâi kơdrâi kal châ tŏng gum.

“ ‘Na hnoăng cheăng hnê tối hbrâ mơdât roê tê mơngế mê tung pơla hdrối nah xuân châ khu râ Đảng, khu kăn pơkuâ tơmâng ngăn khât. Tung mâu hơnăm hdrối mê xuân ai 1 hô̆i viên tro tê ngi Sinuâ. Klêi kơ’nâi vêh dêi ngi tơnêi têa, ngế hô̆i viên kơdrâi kố chiâng kơxiâp, klêi mê châ mâu kơvâ đoân theh xuân môi tiah rêm râ Hô̆i tơmâng ngăn pro tơ’lêi hlâu ƀă hbrâ rơnáu ‘nâi nhên hiâm mơno púi vâ, tơpui tro tơdroăng ƀă ai mâu rơkong mơhnhôk mê nâ ki mê kâi tơkâ luâ dêi tơdroăng kơxiâp mê dêi tơná ƀă rế hía rế vâ tơrŭm ƀă pơlê pơla ƀă nâ ki mê xuân hiăng khên tơnôu tâ, hbrâ rơnáu veăng tung mâu khu a cheăm pơlê”.

Tung pơla hdrối kố nah, Khu ngăn vâi kơdrâi kong pơlê Cao Bằng ngăn tơdroăng ki tối tơbleăng tung um tơvi, rơ’jíu hbrâ mơdât roê tê mơngế cho môi tung mâu tơdroăng ki kal xiâm tung pêi pro tơdâng tơ’mô pơla kơdrâi ƀă kơnốu ƀă pơkâ tơleăng mâu tơdroăng kal tơdrêng tơdjâk troh vâi kơdrâi ƀă vâi hdrêng a kong pơlê. Tiô jâ Nông Thị Tuyết, Kăn hnê ngăn vâi kơdrâi kong pơlê Cao Bằng, vâ pêi pro ƀlêi chiâng tơdroăng kal dêi Tơkêa 8, malối cho tối ‘na hbrâ mơdât roê tê mơngế pâ thế túa ki ‘nâi, tơkŭm pêi pro nếo tơmiât troh pơkâ mơdêk tơƀrê ai pơxúa hnoăng cheăng, hbrâ mơdât roê tê vâi kơdrâi, vâi hdrêng; mơdêk ki hlê plĕng tung hô̆i viên, vâi kơdrâi tah lôi tơdroăng pơrah pơla kơnốu ƀă kơdrâi, xiăn pâm tung rơpŏng hngêi, roê tê vâi kơdrâi, vâi hdrêng.

Xuân tiô Kăn hnê ngăn vâi kơdrâi kong pơlê Cao Bằng, tung pơla hdrối nah, Khu hiăng hnê mơhno mâu tôh tối tơbleăng tung rơ’jíu, loâ um tơvi kal tối nhên ‘na tơdroăng ki pơlông heâk, dêi mâu ngế ki roê tê mơngế; pơkâ tiô luât pơxâu ‘na tơdroăng xôi roê tê mơngế ƀă túa ki pơkâ tơleăng drêng châ hlo tơdroăng ki roê tê vâi kơdrâi, vâi hdrêng kô ai tung tơdroăng ki khât; ai mâu troăng hơlâ ƀă tơdroăng cheăng dêi khu ngăn vâi kơdrâi rêm râ tung tŏng gum, rak vế mâu ngế ki tro vâi rup tê roê vêh dêi ngi hngêi ƀă hên ki ê.

Mâu túa tối tơbleăng tung um tơvi a Cao Bằng ăm hlo tơdroăng pơhlêh nếo, rơkê dêi rêm râ hô̆i, hnoăng cheăng, tơdroăng ki pôu râng dêi kăn ƀô̆, hô̆i viên vâi kơdrâi, tôh tối tơbleăng tung um tơvi pơlê pơla tung hbrâ mơdât roê tê mơngế, tơdjuôm ivá mơjiâng tơnêi tơníu ối tơniăn ăm vâi kơdrâi ƀă vâi hdrêng kơdrâi.