Thái hnê chư Hoàng Trọng Hải, thái yăo hngêi râ má péa Čư̆ Pui, cheăm Čư̆ Pui, tơring Krông Bông, kong pơlê Dak Lak, hiăng lối 10 hơnăm hnê akố xuân cho to mê hơnăm thái rơtế ƀă mâu vâi pú troh a rêm hngêi, tơgôu rêm to bo péa vâ mơhnhôk hok tro tro a lâm. Thái yăo Hoàng Trọng Hải tối: Čư̆ Pui cho cheăm kơpong 3, malối xơpá, hok tro hdroâng kuăn ngo châ troh 80%. Nôu pâ mâu vâi hok tro akố vâi ăm dêi kuăn ‘nĕng pơtê hriâm gum nôu pâ rơpŏng hngêi pơhlêh ƀă tơdroăng ki ăm vâi troh hngêi trung hriâm tâp. Tơdroăng ki mơhnhôk vâ hok tro troh a lâm hriâm cho tơdroăng ki ôh ti tơ’lêi hlâu klâi. La ƀă thái Hải maluâ pá puât to lâi la xuân ối pêi, tâi tâng xua tơdroăng cheăng dêi mâu vâi o tung la ngiâ.

 “Thái cô lăm troh a tơrêm to hngêi hok tro, mơhnhôk nôu pâ vâi pro tơ’lêi ăm mâu vâi o troh hngêi trung. Má péa cho tiâ mơnhên, mơhnhôk tơ’nôm pôi tá ăm mâu vâi o lăm chiâk drêng tá hâi tro hơnăm pêi cheăng. Hngêi trung tơrŭm ƀă khu kăn pơkuâ cheăm pêi cheăng kố đi đo”.

Xuân cho kơpong 3 ki malối xơpá, cheăm Ea Sin, tơring Krông Ƀuk, kong pơlê Dak Lak rêm hơnăm vâ vâi hdrêng troh a lâm hriâm tŭm drêng troh hơnăm hriâm athế kal tơdroăng veăng kum dêi khu pơkuâ tơdroăng kal kí. Pôa Trần Văn Tiến, Kăn hnê ngăn Vi ƀan cheăm ăm ‘nâi, tung cheăm ai môi to hngêi trung mầm non ƀă môi to hngêi trung ki tơkŭm râ má môi, râ má péa. Tâi tâng kơxô̆ hok tro tung hơnăm 2024-2025 lối 500 ngế.

Ing apoăng khế 8, cheăm hiăng hnê mơhno mâu khu pú hên, chêh tơkŭm inâi mâu vâi muăn tung hơnăm troh hngêi trung, malối cho râ mầm non ƀă râ má môi vâ troh rêm to hngêi hnê pơchân nôu pâ hok tro tơtrŏng ăm mâu vâi muăn troh hngêi trung tro hâi khế pơkâ.

 “Tung pơla hdrối kố nah ƀă khu ki pơkuâ ngăn hngêi trung hiăng hnê mơhno mâu kơvâ cheăng rêm râ tơrŭm hnê tối mâu vâi muăn troh hngêi trung tung hơnăm hriâm. Ngăn tơdjuôm hnoăng cheăng rah xo hok tro hriâm lâm 1, ƀă mầm non hơnăm kố pơrá châ châ hên tiô pơkâ. Troh nôkố mâu hngêi trung hiăng rah xo tŭm kơxô̆ hok tro vâ hbrâ ăm hơnăm hriâm nếo”.

Hnoăng cheăng tŏng gum hok tro xơpá xuân châ mơdêk rơdêi. A Ƀơrô cheăng Đoân – Đô̆i, hngêi trung râ má môi Tô Hiệu, pơlê kong kơdrâm Ƀuôn Ma Thuột, kong pơlê Dak Lak mâu hâi ki kố, đi đo ai cô yăo tơdah xo mơ-éa hriâm, mơ-éa chêh, hmân ếo ton dêi hok tro hneăng hdrối gum ăm hok tro ai tơdroăng rêh ối xơpá hneăng kơ’nâi. Tơrêm mâu kơxop hlá mơ-éa châ klâ xoăng, lŭm chá pa kong lĕm, hmân ếo roh krúa, vâ ăm mâu vâi o.

Cô yăo Đoàn Thị Tuyết Yến, cô pơkuâ hngêi trung ăm ‘nâi: Hơnăm hriâm 2024-2025, hngêi trung ai lối 1.200 ngế hok tro, ing lâm 1 troh lâm 5. Môi kơpêng pŭn tung kơxô̆ ki mê cho kuăn muăn hdroâng kuăn ngo Rơđế a Ƀuôn A Lê B, hên vâi o ối tung rơpŏng kơtiê.

 “Hngêi trung hiăng tơbleăng ăm ngế ki pơkuâ đô̆i séa ngăn mâu hok tro ki ối tung rơpŏng kơtiê ai tơdroăng ki kơjo kum ƀă tơmâng ngăn. Hngêi trung hiăng chêh tơkŭm ƀă ai mâu kơxuô tơmeăm hbru ăm mâu vâi o a hâi pơxiâm vâ mot hơnăm hriâm. Rak tơniăn tŭm ‘na hlá mơ-éa hriâm hlá mơ-éa chêh vâ vâi o troh hngêi trung hriâm ai túa hlá mơ-éa, kế xúa tung hriâm tâp môi tiah mâu vâi pú ki ê. Má péa, cho veăng tơlo ing mâu vâi pú ki hriâm a hngêi trung hơnăm hdrối ‘na hmân ếo, kế xúa ki vâi ôh tá xúa kô diâp ăm mâu vâi o ki ai tơdroăng rêh ối xơpá”.

A tơring tơkăng kong Buôn Đôn, kong pơlê Dak Lak dế nôkố, mâu hngêi trung hiăng hbrâ rơnáu ăm hơnăm hriâm nếo. Tiô pôa Đỗ Ngọc Anh, ngế pơkuâ ƀơrô cheăng Hnê hriâm ƀă hnê mơhno tơring, hơnăm 2024-2025, tung lâp tơring ai lối 16 rơpâu hok tro a 34 tíu hriâm ing râ mầm non troh râ má pái phôh thong ƀă yăo yuk thương xuên. 50% kơxô̆ ngế hok tro cho kuăn ‘nĕng hdroâng kuăn ngo,tơdroăng rêh ối, ối hên pá puât. Vâ mâu vâi o troh hngêi tŭm, Ƀơrô ngăn Hnê hriâm ƀă hnê mơhno hiăng kơhnâ tí tăng ‘nâi plĕng ăm Vi ƀan hnê ngăn tơring, tơrŭm ƀă mâu khu râ, kơvâ cheăng ki ai tơdjâk troh rĕng tơbleăng mâu tơdroăng tŏng gum tiô troăng tŏng gum ăm mâu vâi o.

Tơdrêng amê hlối tơrŭm ƀă mâu hngêi trung ki ê ai túa pơkâ pêi nhên tung tơdroăng thăm mơdêk mơhnhôk hok tro troh hngêi trung, mơdêk rơdêi tơdroăng ing pơlê pơla tŏng gum hnê hriâm, pêi pro tơƀrê tơdroăng cheăng rơtế ƀă hok tro ki ai tơdroăng rêh ối xơpá. Pôa Đỗ Ngọc Anh tối ăm ‘nâi:

 “Mâu hngêi trung xuân hiăng tơrŭm tơdjêp ƀă mâu khu ki pleăng dêi tơmeăm khoăng, mâu khu ki ai hiâm mơno hơ-ui hiăng tŏng gum ăm mâu vâi o hok tro, kế xúa tung hriâm tâp, hmân ếo vâ gum ăm mâu vâi o ai ivá hơniâp ro vâ mâu vâi o troh hngêi trung”.

A tơring Ea Súp, xuân cho môi tơring tơkăng kong dêi kong pơlê Dak Lak, hơnăm hriâm kố tiô tối hdrối ai vâ chê 18 rơpâu ngế hok tro troh hngêi trung. Pakĭng tơdroăng ki ‘mêng rơnêu mâu kơƀăng tăng vâ xúa tung hriâm tâp ăm hok tro, hnê tơ’nôm ăm mâu thái cô, kơvâ cheăng hnê hriâm ƀă hnê mơhno tơring hiăng pêi pro séa ngăn mâu hok tro pá puât vâ teăm tơrŭm ƀă mâu khu pơkuâ tơdroăng kal kí pơlê pơla, mâu khu ki ai hiâm mơno tŏng gum ăm mâu vâi o, ôh tá ăm o ki lâi xua pá puât mê athế pơtê hriâm. Pôa Nguyễn Văn Khóa, ngế pơkuâ Ƀơrô cheăng Hnê hriâm ƀă hnê mơhno tơring Ea Súp, kong pơlê Dak Lak ăm ‘nâi:

 “Ƀơrô cheăng ngăn Hnê hriâm ƀă hnê mơhno hiăng pơkâ thế mâu hngêi trung hriâm séa ngăn hok tro ki ai tơdroăng rêh ối pá puât vâ mơhnhôk tŏng gum ăm hlá mơ-éa hriâm, hlá mơ-éa chêh, kế tơmeăm xúa tung hriâm tâp vâ tơkŭm po tơdroăng tŏng gum troh hngêi trung a hơnăm hriâm nếo 2024-2025. Troh nôkố hiăng tơdah xo lối 18.700 kơxop hlá mơ-éa chêh ƀă diâp 50 toăng rơxế mái ƀă 50 kơxuô tơmeăm ăm hok tro hdroâng kuăn ngo, rơpŏng kơtiê xơpá”.

Hơnăm hriâm 2024-2025, tung lâp kong pơlê Dak Lak ai vâ chê 500 rơpâu ngế hok tro hriâm a rêm râ. A kơpong hngế hngo xuân ối hên rơpŏng ai tơdroăng pá puât. La ƀă mâu tơdroăng ki tŏng gum troh hngêi trung ƀă mâu vâi o hok tro kơtiê châ kơvâ ngăn hnê hriâm ƀă hnê mơjiâng tuăn ngo rơkê Dak Lak tơrŭm ƀă mâu tơring cheăm, tíu pêi cheăng tung kong pơlê tơbleăng ing hdrối hiăng gum mâu vâi o ai tơdroăng hbrâ rơnáu krâu ăm hơnăm hriâm nếo.

Tơdroăng pêi ai pơxúa kố ôh ti xê to veăng gum mơdêk khôi hmâ tŏng gum dêi rơpó mê ối pro tơ’nôm tơdroăng loi tơngah, ivá, gum hok tro kơtiê ai tơdroăng rêh ối xơpá hmiân tuăn troh hngêi trung drêng hơnăm hriâm nếo hiăng vâ chê troh.