Rơpŏng pôa Điểu Thắng, hdroâng M’Nông, ối a thôn Tân Bình, cheăm Dak Ngo, tơring Tuy Đức, kong pơlê Dak Nông ai 5 ngế la nôkố bu ai môi ngế pôa cho ngế ki pêi cheăng xiâm tung rơpŏng. Kơdrâi pôa tro khăng kơbrê̆n, kuăn kơnốu ki kân tro khăng kơbrê̆n, nôkố ôh tá kâi pêi cheăng. Pôa Điểu Thắng ối 2 ngế kuăn kơdrâi hơnăm kố 15 hơnăm ƀă 16 hơnăm, hok tro lâm 9 Hngêi trung râ má péa ƀă râ má pái Lê Hữu Trác, cheăm Dak Ngo.

Apoăng hơnăm hriâm nếo, thái pơkuâ lâm hiăng troh a hngêi mơhnhôk mâu vâi muăn troh hngêi trung ƀă tơbleăng mâu kơlo ki tŏng gum dêi Tơnêi têa. Pôa Điểu Thắng ăm ‘nâi, mâu hơnăm hdrối nah kơnôm ai mâu troăng hơlâ tŏng kum dêi Đảng, Tơnêi têa ăm hok tro pá puât, péa ngế kuăn kơdrâi pôa châ troh hngêi trung, ôh tá lo pơtê hriâm tơdế rá.

“Rơpŏng á pá puât khât, mê nếo hngêi trung hriâm hngế, xuân kơnôm châ tơdroăng tơmâng ngăn tŏng gum dêi Đảng, Tơnêi têa, hngêi trung, tŏng gum ăm mâu vâi muăn liăn kâ, liăn ối, liăn prôk vêh. Á xuân mơ-eăm mơhnhôk mâu vâi kuăn mơ-eăm lăm hriâm vâ ‘nâi chư, ‘nâi riân vâ tơdroăng rêh ối xo ah hmôi gá chía châ chía niân tâ”.