Tung toăng hngêi ki rơdâ 70 met karê ki nếo klêi meăn pơklêp gât ƀă pơxiâm vâ meăn xơmong a pơlê  Bôn Chơ Ma, cheăm Ia Trôk, tơring Ia Pa, kong pơlê Gia Lai, nâ Siu Shin Cha, 25 hơnăm, phiu ro. Nâ tối, hngêi ki kố hdró tơdroăng cheăng dêi rơpŏng, ing rơpŏng kơtiê troh hluăn ing kơtiê khât. Tiô nâ Siu Shin Cha, rôh tơ’lêi troh ƀă rơpŏng ing hơnăm 2020, drêng mung châ 50 rơtuh liăn ing Hngêi rak liăn Tŏng gum rêh ối Pơlê pơla:

"Kơnôm ing kơxô̆ liăn mung kố mê rơpŏng ai liăn vâ mơnhông pêi cheăng kâ. Rơpŏng roê tơ’nôm 2 to ro kăn păn ai tơ’nôm kuăn châ 8 to ƀă nếo pro tơ’nôm hngêi krá kâk môi tiah kố. Kơnôm ing tê ro mê rơpŏng ai liăn mơnhông cheăng kâ, pêt tơ’nôm hât, roê rơxế kong nong”.

Khế hơnăm hluăn ing kơtiê dêi rơpŏng pôa Rơ Chăm Hà, kot mâ hơnăm 1962, a thôn HɃel, cheăm Ia Kdăm xuân châ tŏng gum xua ing kơxô̆ liăn mung. Rơpŏng ai 5 ngế la bu ai môi toăng hngêi 24 met karê châ pro ing kơxô̆ liăn tŏng gum ƀă ing kơxô̆ liăn tê báu 2 sào klâng. Mâu kơxô̆ liăn ‘no hrê cho ing tơdroăng cheăng pêi cheăng vâi ôh tá tơniăn. Khŏm mơ-eăm châ hluăn ing kơtiê, hơnăm 2021, pôa Hà khên tơnôu mung 50 rơtuh liăn ing Hngêi rak liăn tŏng gum rêh ối pơlê pơla ing tôh ăm mung tung cheăm.

Pôa xúa kơxô̆ liăn kố roê 2 to ro ƀă pêt hdrê a tơnêi ki tá hâi pêt klâi tung hngêi vâ pêt nhâ. U ối pôa mung tơ’nôm tơnêi pêt pôm loăng vâ pêi lo tơ’nôm liăn. Nôkố, pôa Hà ôh ti xê hluăn ing kơtiê mê ối ai tơdroăng rêh ối tơniăn lĕm tâ.

"Apoăng á roê 6 to chu, tung pơla păn gá hiăng hlâ châ tơdế. Klêi mê á lăm roê rôh má péa păn tơ’nôm 18 to. Drêng tê ai liăn pro hngêi, roê tơ’nôm 4,4 sào tơnêi vâ ai tơnêi pêt tơmeăm, rôh ki ‘nâ pêt báu, ai rôh ki ‘nâ pêt hât. Pêi châ liăn dêi rơpŏng hiăng chía tơniăn, ai liăn ăm kuăn ‘nĕng xo ah hmôi nếo”.

Pôa Trần Ánh Tôn, Kăn pơkuâ Hngêi rak liăn tŏng gum rêh ối pơlê pơla tơring Ia Pa, Gia Lai ăm ‘nâi: A tơring Ia Pa, ai vâ chê 2.200 rơpŏng kơtiê, ki hên cho mâu rơpŏng hdroâng kuăn ngo. Vâ tơniăn tâi tâng rơpŏng kơtiê châ mung kơxô̆ liăn kơjo, 168 tôh kơdĭng ƀă mung liăn a 9 tíu ăm mung hiăng tơbleăng séa ngăn ƀă tŏng gum ngế kơtiê châ mung, chêh pro klêi hlá mơ-éa. Ing hơnăm 2021 troh nôkố, hiăng ai 6.610 rơpŏng a tơring hluăn ing kơtiê kơnôm ing xúa tơƀrê kơxô̆ liăn mung.

“Ƀơrô cheăng ăm mung hiăng tơkŭm kơjo kơxô̆ liăn ăm 3 tơdroăng kơdroh kơtiê, tŏng gum rơpŏng kơtiê ƀă vâ chê kơtiê. Tơniăn mâu ngế ki châ mung ai tŭm kơxô̆ liăn, drêng ai pơkâ thế ƀă ai tŭm tơdroăng, ƀơrô cheăng kô kơjo gum ăm rơpŏng hdroâng kuăn ngo rĕng châ mung ƀă teăm tơdrêng vâ pêi cheăng kâ tê mơdró a cheăm tơring. Riân troh nôkố, tâi tâng kơxô̆ liăn chĕn dêi 3 tơdroăng hluăn ing kơtiê a ƀơrô cheăng hiăng châ lối 166 rơtal liăn ƀă 3.900 rơpŏng mung, châ 36,7% tâi tâng kơxô̆ liăn chĕn”.

Tung 10 hơnăm kong pơlê Gia Lai pêi pro Pơkâ 40-CT/TW 2014 dêi Khu pơkuâ hnê ngăn Đảng ‘na thăm mơdêk pơkuâ dêi Đảng ƀă tơdroăng ăm mung liăn tŏng gum, hiăng ai 156 rơpâu rơpŏng kơtiê a kong pơlê châ mung, tâi tâng cho 7.600 rơtal. Ing mê, 55.600 rơpŏng hiăng hluăn ing kơtiê. Liăn tŏng gum pơlê pơla xuân cho kơxô̆ liăn ki kal vâ Gia Lai pro lối 242 to tíu têa krúa ƀă lối 3 rơpâu toăng hngêi ăm rơpŏng kơtiê a mâu cheăm ki malối xơpá.

Tiô mơnhên tối dêi khu pơkuâ hnê ngăn Đảng Gia Lai, ăm mung liăn tŏng gum cho “ivá ki tơtro” gum mâu rơpŏng, mâu ngế ki châ tơnêi têa gum ƀă mâu ngế ki pá puât a kong pơlê mơnhông, pơhlêh tơdroăng rêh ối, veăng gum kơdroh kơtiê krá ton. Kố xuân cho liăn ngân ki kal tung la ngiâ, veăng gum tung mơjiâng thôn pơlê nếo, mơnhông cheăng kâ rêh ối pơlê pơla kơpong hdroâng kuăn ngo ƀă peăng kong ngo a kong pơlê Gia Lai.